Azərbaycan, Bakı, 4 iyul /Trend, müxbir Ulucay Məmmədov/
Bu gün futbol üzrə dünya çempionatında 1/4 final mərhələsinin ilk oyunları keçiriləcək.
Trend xəbər verir ki, mundialın ilk yarımfinalçıları Rio-de-Janeyro və Fortaleza şəhərlərində müəyyənləşəcək.
"Marakana" stadionunda favoritlərdən sayılan Fransa və Almaniya yığmaları qarşılaşacaq. Oyun Bakı vaxtı ilə saat 21:00-da baş tutacaq.
DÇ-nin digər yarımfinalçısı isə iki Cənubi Amerika təmsilçisinin görüşündən sonra bilinəcək.
Fortaleza şəhərində reallaşacaq oyunda ev sahibi, beşqat dünya çempionu Braziliya və builki mundialda bütün oyunlarını qələbə ilə başa vuran Kolumbiya millisi qarşılaşacaq. Görüş Bakı vaxtı ilə saat 01:00-da "Kastelo" stadionunda keçiriləcək.