Bakı. Trend:
Dünya basketbolunun ən titullu oyunçularından biri, Yuqoslaviya millisinin keçmiş üzvü və 1980-ci il Olimpiya çempionu Drajen Dalipagiç 73 yaşında vəfat edib.
Trend-in məlumatına görə, Beynəlxalq Basketbol Federasiyası (FIBA) onun uzun sürən xəstəlikdən sonra dünyasını dəyişdiyini təsdiqləyib.
Dalipagiç, basketbol dünyasında qazandığı uğurlarla tanınır. O, Moskva Olimpiadası ilə yanaşı, 1978-ci il dünya çempionatında və üç dəfə Avropa çempionatında (1973, 1975, 1977) qızıl medal qazanaraq, Yuqoslaviya millisinin əfsanəsinə çevrilib. Ümumilikdə, Dalipagiç milli komanda ilə 12 medal əldə edib və 243 beynəlxalq oyunda 3,700 xal toplayaraq Yuqoslaviya millisinin ən yaxşı bombardiri adını qazanıb.
Klub səviyyəsində Dalipagiç "Partizan" ilə iki dəfə Yuqoslaviya çempionu olub və 1978 və 1979-cu illərdə Korats Kubokunu qazanıb. O, həmçinin "Udine", "Verona", "Venesiya", "Srvena Zvezda" və "Real Madrid" klublarında parlaq çıxışlar edib.
Basketbol Şöhrət Zalının üzvü olan Dalipagiç, idman dünyasında silinməz iz buraxıb. Onun itkisi basketbol aləmində dərin hüznlə qarşılanır.