Bakı. Trend:
Afrika Millətlər Kubokunun yarımfinal matçında Mərakeş Nigeriya yığmasını penaltilər seriyasında məğlub edərək finala yüksəlib.
Trend xəbər verir ki, qarşılaşmanın əsas və əlavə vaxtı qolsuz bərabərliklə (0:0) başa çatıb. Penaltilər seriyasında isə mərakeşli futbolçular 4:2 hesabı ilə üstün olublar.
Beləliklə, Mərakeş yığması 2004-cü ildən sonra ilk dəfə Afrika Millətlər Kubokunun finalına vəsiqə qazanıb. Həmin il finalda Tunisə 1:2 hesabı ilə məğlub olan Mərakeş turniri indiyədək yalnız 1976-cı ildə qazanıb.
Finalda Mərakeşin rəqibi yarımfinalda Misiri 1:0 hesabı ilə məğlub edən Seneqal olacaq.
Qeyd edək ki, Afrika Millətlər Kuboku yanvarın 18-də başa çatacaq. Turnirdə 24 Afrika ölkəsinin milli komandası iştirak edir, oyunlar isə Mərakeşin altı şəhərində keçirilir.
xxx
23:52
Afrika Millətlər Kubokunda Seneqal və Misir komandaları arasında keçirilən yarımfinal oyunu başa çatıb.
Trend xəbər verir ki, qarşılaşmada Seneqal yığması 1:0 hesabı ilə qələbə qazanıb.
Matçın yeganə qolunu 78-ci dəqiqədə uzaq məsafədən dəqiq zərbə ilə seneqallı hücumçu Sadio Mane vurub.
Bu nəticə ilə Seneqal turnirin finalına yüksəlib və həlledici oyunda Nigeriya–Mərakeş qarşılaşmasının qalibi ilə üz-üzə gələcək.
Qeyd edək ki, Afrika Millətlər Kubokunun hazırkı qalibi Kot-d’İvuar komandasıdır.