...

BANM-da Gənclər Günü qeyd olunub (FOTO)

İqtisadiyyat Materials 2 Fevral 2018 13:51 (UTC +04:00)
Bakı Ali Neft Məktəbinin (BANM) yeni kampusunda 2 fevral - Gənclər Günü münasibətilə tədbir keçirilib.
BANM-da Gənclər Günü qeyd olunub (FOTO)

Bakı. Trend:

Bakı Ali Neft Məktəbinin (BANM) yeni kampusunda 2 fevral - Gənclər Günü münasibətilə tədbir keçirilib.

Trend-in məlumatına görə, tədbirdə Ali Məktəbin rektoru Elmar Qasımov, Azərbaycan Respublikasının Prezidenti yanında Gənclər Fondunun icraçı direktoru Fərhad Hacıyev, YAP Gənclər Birliyinin sədri Seymur Orucov, BANM-ın professor-müəllim heyəti, tələbələri və media nümayəndələri iştirak ediblər.

BANM-ın rektoru E.Qasımov bütün tədbir iştirakçılarını salamlayıb. Rektor qeyd edib ki, 1996-cı il fevralın 2-də ümummilli lider Heydər Əliyevin dəstəyi ilə gənclərin birinci forumu keçirilib, bu forum ölkəmizdə gənclər hərəkatının vüsət almasına təkan verib və məhz həmin günün əhəmiyyəti nəzərə alınaraq 2 fevral tarixi gənclər günü kimi qeyd edilməyə başlanıb. Azərbaycanda gənclərə dövlət səviyyəsində böyük qayğı və diqqət göstərildiyini deyən E.Qasımov gəncliyin ölkəmiz, cəmiyyətimiz üçün dəyərli sərvət olduğunu diqqətə çatdırıb. Rektorun sözlərinə görə, Prezident İlham Əliyevin müvafiq fərmanı ilə yaradılan BANM-ın fəaliyyətinin əsas məqsədi də ölkəmizdə yüksək ixtisaslı, ingilisdilli, peşəkar və müasir standartlara cavab verən gənc mühəndislər yetişdirməkdir. Rektor qeyd edib ki, Bakı Ali Neft Məktəbi dünyanın tanınmış universitetlərinin təcrübəsinə əsaslanaraq tədris proqramında ən son texnoloji nailiyyətləri tətbiq edir və məhz elə bu keyfiyyətin nəticəsidir ki, BANM-ın yola saldığı ilk məzunları artıq SOCAR , BP, Halliburton, Maire Tecnimont, Schlumberger, Türkiyədə STAR Neft Emalı Zavodu və s. kimi transmilli şirkətlərdə çalışır.

Çıxışının sonunda E.Qasımov bayram münasibətilə bütün gəncləri, o cümlədən BANM-ın tələbələrini təbrik edib, uğurlar arzulayıb.

Tədbirdə həmçinin Gənclər Fondunun icraçı direktoru Fərhad Hacıyev və YAP Gənclər Birliyinin sədri Seymur Orucov çıxış ediblər. Bakı Ali Neft Məktəbinin fəaliyyətini yüksək qiymətləndirən natiqlər Ali Məktəbin ölkədə yüksək ixtisaslı mütəxəssis hazırlığına böyük töhfələr verdiyini bildiriblər.

Tədbir zamanı Ali Məktəbi müxtəlif tədbir, müsabiqə, seminar və konfranslarda layiqincə təmsil etmiş tələbələrin mükafatlandırılması mərasimi olub. Rektor tərəfindən tədris ili ərzində müxtəlif sahələrdə fəallıq göstərən və uğur əldə edən tələbələr, BANM-da keçirilən müxtəlif daxili intellektual və əyləncəli turnirlərin, təlimlərin, müxtəlif daxili müsabiqələrin qalibləri, respublika üzrə və ölkədə hüdudlarından kənarda keçirilən bir sıra çempionatlarda fəal iştirak etmiş komandaların üzvləri, həvəsləndirici diplomlarla, sertifikatlarla və hədiyyələrlə təltif olunublar.

Tədbir bədii konsert proqramı ilə yekunlaşıb.

Məqalədə:
Xəbər lenti

Xəbər lenti