Azərbaycan, Bakı / Trend , müxbir İ.Xəlilova / Kapital Bank ASC-nin tam dövlətsizləşdirilməsi barədə qərar qəbul olunub, belə ki, 2007-ci ildə onun dövlət payının yalnız 50 faizi xüsusi mülkiyyətin hesabına keçib. Prezidentin Sərəncamına əsasən oktyabrın 19-dan dövlət payından qalan 50 faiz satılacaq.
Belə ki, 10 manat nominal dəyərlə 1,2 mln. səhm əmək kolektivi, fiziki və hüquqi şəxslər tərəfindən reallaşdırıla bilər. Nominal dəyərlə 5 faiz səhm olmaqla əmək kolektivinə, 10 faiz hər səhm zərfində 6 min ədəd səhm olmaqla müsabiqə formasında fiziki şəxslərə, 85 faiz isə hər səhm zərfində 60 min ədəd səhmdən ibarət olmaqla müsabiqə formasında hüquqi şəxslərə satıla bilər.
Bir hüquqi şəxsin 360 min ədəd (6 zərf) səhmdən artıq həcmdə səhmlərə sifariş vermək hüququ yoxdur. Səhmlər hüquqi şəxslərə müəyyən edilmiş meyar və şərtlərə əsasən, fiziki şəxslərə isə "Banklar haqqında" qanuna müvafiq olaraq satılacaq.
Azərbaycanın maliyyə naziri Samir Şərifovun bu yaxınlarda verdiyi bəyanata görə, Kapital Bank-ın tam özəlləşdirilməsi nəticəsində Dövlət büdcəsinə 30 mln. manatdan çox gəlir gələ bilər. Kapital Bank-ın 50 faizinin satışında artıq 12 mln. manat əldə olunub ki, bu da onun nizamnamə kapitalının 24 mln. manata qədər qaldırılmasına yönəldilib.
Dövlət bankının yeni səhmdarları AtaHolding (20 faiz səhm), Xalq Bank (20 faiz) və Azersun Holding (10 faiz) olub.
