İsrail, Qüds / Trend , müxbir R. Məmmədov/ Bir neçə ay ərzində üçtərəfli Azərbaycan-Türkiyə-İsrail biznes-forumunun keçirilməsi üzrə layihə işlənib hazırlanacaq. İstanbulda Yaxın Şərq Azərbaycanlıları Konqresinin Sahibkarlar və İş Adamları İttifaqının nümayəndələrinin Türkiyənin Xarici İqtisadi Əlaqələr Şurasının təmsilçiləri ilə danışıqları baş tutub. Bu barədə çərşənbə axşamı Yaxın Şərq Azərbaycanlıları Konqresinin prezidenti Aleks Şapiro- Suliman məlumat verib.
"Türkiyənin Xarici İqtisadi Əlaqələr Şurasının sədri Əkrəm Güvendiren üçtərəfli biznes- forumun keçirilməsi ideyasını təqdir edib və üç dost ölkənin birləşməsi ideyasının çox maraqlı olduğunu bildirib" - deyə Şapiro- Suliman bildirib.
Onun sözlərinə görə, görüşdə Güvendiren bəyan edib ki, biznes-forumun keçirilməsi ideyası böyük perspektivə malikdir və bunun üçün tərəflər bütün imkanlara malikdirlər.
"Görüş bizim üçün çox mühüm strateji, işgüzar əhəmiyyətə malikdir, çünki biz, azərbaycanlıların Konqresi kimi, həmişə türk qardaşlarımızın dəstəyini hiss edirik" - deyə Şapiro- Suliman qeyd edib. "Əldə olunmuş razılıqlar bizim layihəyə real dəstəyin göstərilməsinin, daha sıx əməkdaşdlığa və bu ölkələrin strateji tərəfdaşlığına müsbət təsir göstərə biləcək ümumi maraqlarımızın sübutudur" - deyə o əlavə edib.
Konqres prezidenti qeyd edib ki, İstanbul danışıqları Türkiyənin İsraildəki səfiri Namiq Tanın köməyi ilə baş tutub.
