Azərbaycan, Bakı / Trend , müxbir İ.Xəlilova/ Azərbaycan hökuməti Polşa hökumətindən kredit almağa razılıq verib. Cümə axşamı, Azərbaycan - Polşa hökumətlərarası komissiyanın iclasının nəticələrinə həsr olunmuş mətbuat konfransında Azərbaycan iqtisadi inkişaf naziri Heydər Babayevin dediyinə görə, Azərbaycan və Polşa maliyyə nazirləri şərtləri müzakirə edib, layihələri konkretləşdirəcəklər.
"Bu kredit - güzəştli şərtlərlədir və bu vəsaitlər ona görə verilmir ki, Polşa tərəfi müəyyən faizlər əldə etsin. Bizim xarici borclar üzrə siyasətimiz də konkret müəyyən olunub", - nazir deyib. Kredit yalnız Polşa və Azərbaycan arasında birgə layihələrin həyata keçirilməsi üçün istifadə olunacaq.
Babayevin sözlərinə görə, Azərbaycan tərəfi öz tərəfindən tərəfdaş axtarmaq niyyətindədir. O hesab edir ki, layihə ilk əvvəl tikinti sektotru, ərzaq saxlanılması sahəsində olmalıdır. "Çox güman ki, Azərbaycan tərəfdən tərəfdaş kimi Azərbaycan İnvestisiya Təşkilatı çıxış edə bilər", - Heydər Babayev deyib.
Kredit məbləği layihənin dəyərindən asılı olacaq. Polşa təcrübəsi göstərir ki, dövlət kreditinin minimal məbləği 15 mln. dollar təşkil edir, maksimal məbləğ isə, son zaman Çinlə imzalanan razılaşmaya əsasən, 280 mln. dollar olub.
"Biz həm də razılaşdıq Ki, həcmlərlə özümüzü çərçivəyə salmayaq. İlk əvvəl layihəni müəyyənləşdirək. Lakin çox güzəştli kredit ayırmaq istəyi var", - nazir dəqiqləşdirib.