Azərbaycan, Bakı / Trend müxbir Ü.İsmayılova / Azərbaycanın iri banklarından biri olan "Bank of Azerbaijan"ın törəmə sığorta şirkəti olan "Qarant sigorta" 2008-ci ilin birinci yarısından fəaliyyətə başlayacaq. Bu barədə cümə axşamı bankın marketinq üzrə mütəxəssisi Anar Osmanov məlumat verib.
"Qarant sigorta" artıq Ədliyyə Nazirliyində qeydiyyatdan keçib və sığorta fəaliyyəti üzrə lisenziya əldə etmək məqsədilə Maliyyə Nazirliyinə müraciət edib" - deyə Osmanov qeyd edib.
Osmanovun sözlərinə görə, şirkətin rəhbərliyi, eləcə də xarici kapitalın təmsil olunub-olunmayacağı hələ müəyyənləşdirilməyib. Bu kimi məsələlər sığorta fəaliyyəti üzrə lisenziyanın alınmasından sonra müzakirə olunacaq.
Birinci mərhələdə şirkətin nizamnamə kapitalı tələb olunan minimal səviyyədə olacaq.
Azərbaycanda "Sığorta haqqında" mövcud qanuna əsasən sığorta şirkətlərinin minimal səviyyəsi 700 min manat olmalıdır. Hazırda parlamentin payız sessiyasında müzakirə olunan sığorta haqqında qanun layihəsinə əsasən isə nizamnamə kapitalının minimal səviyyəsi 1 mln. manat təşkil etməlidir.
"Bank of Azerbaijan"1993-cü ildən fəaliyyət göstərir. Noyabrın 1-i üçün bankın aktivləri 87,202 mln. manat, ümumi kapitalı 16, 617 mln. manat, nizamnamə kapitalı isə 10 mln. manat təşkil edib.
