Azərbaycan, Bakı , / Trend müxbir S.Babayeva / Bazar ertəsi Əhalinin Əmək və Sosial Müdafiəsi Nazirliyinin Baş Məşğulluq İdarəsindən verilən xəbərə görə, Azərbaycanın işsiz və iş axtaran vətəndaşları üçün Bakıda əmək yarmarkası keçiriləcək. İdarə ölkədə işsizliyi azaltmaq üçün 2007-2011-ci illəri əhatə edən dövlət proqramı çərçivəsində müntəzəm olaraq əmək yarmarkaları keçirir. İki günlük yarmarka 6-7 dekabrda Bakıda, Əl Oyunları Sarayında baş tutacaq. Bu gün idarə yarmarkada iştirakda maraqlı olan işəgötürən şirkətlərdən ərizələri qəbul edir. "Biz şirkətləri yarmarkada fəal iştirak etməyə çağırırıq. Çünki bu, tələb olunan mümkün kadr seçimi nöqteyi-nəzərindən onlara sərfəlidir" - Əmək Nazirliyindən bildirirlər. Ümumi olaraq bu ilin mayından Əmək Nazirliyi tərəfindən Naxçıvan Muxtar Respublikası da daxil olmaqla Azərbaycanın 54 şəhər və rayonunda yarmarkalar keçirilib. Bu dövr ərzində 6 min nəfər işə qəbul olunub. Statistika üzrə Dövlət Komitəsinin məlumatına görə, yanvar-sentyabr ayları ərzində rəsmi olaraq qeyd olunan işsizlərin sayı 50.5 faizi qadın olmaqla 51.3 min nəfərə çatıb. Azərbaycanda bir iş yerinə rəsmi olaraq qeydiyyata alınmış 4 işsiz iddia edir. İşsizliyə görə Azərbaycanda təxminən 1400 nəfər maddi yardım alır. Minimum 24 manat məbləğində olan maddi yardım 6 ay ərzində idarəyə müraciət edənlərə verilir.
...