Azərbaycan, Bakı / Trend müxbir Ü.İsmayılova/ Cümə axşamı Azərbaycanın əmək və əhalinin sosial müdafiəsi naziri Füzuli Ələkbərovun verdiyi məlumata görə, Azərbaycanda valiydeyn himayəsindən məhrum olmuş uşaqlar üçün birgünlük xidmət mərkəzləri (reabilitasiya mərkəzləri) yaradılacaq.
"Mərkəz Bakıda yaradılacaq və 100 nəfər uşağa xidmət göstərmək üçün nəzərdə tutulacaq" - deyə nazir bildirib.
"Hazırda Azərbaycanda özünü doğrulda bilməyən uşaq evləri və internatlar fəaliyyət göstərir" - deyə nazir bildirib. Uşaqlar yetkinlik yaşına çatdıqdan sonra uşaq evini tərk etməli və cəmiyyətə müstəqil olaraq inteqrasiya etməli olurlar.
Nazirlik belə bir mərkəzin yaradılması məqsədilə bir çox ölkələrin təcrübəsini öyrənib və İtaliyadan olan həmkarlarının təcrübəsini mənimsəmək qərarına gəlib, belə ki, Avropa ölkələri uşaq problemlərinə daha ciddi yanaşırlar. Nazirlik ötən həftədən etibarən həmkarları ilə danışıqlara başlayıb və yaxın zamanlarda nazirliyin yeddi əməkdaşı görüləcək işləri araşdırmaq məqsədilə İtaliyaya göndəriləcək.
Nazir mərkəzdə konkret olaraq hansı işlərin görüləcəyini deməkdə çətinlik çəkib, bu, danışıqların başa çatmasından sonra məlum olacaq. "Biz elə etməliyik ki, ölkədə bütün uşaqlar ailədə və ya alternativ ailədə böyüsün" - deyə nazir bildirib.
Ailə, Qadın və Uşaq Problemləri üzrə Dövlət Komitəsinin məlumatına görə, Azərbaycanda 22 min ailəsiz uşaq var.
