Azərbaycan, Bakı / Trend , müxbir İ.Xəlilova / Cümə axşamı Qara Dəniz Ticarət və İnkişaf Bankının (QDTİB) Bakıda səfərdə olan vitse-prezidenti Andrey Kondakovun verdiyi məlumata görə, bank ortamüddətli strategiya çərçivəsində, 2010-cu ilin sonunadək ölkənin banka üzv olan təsərrüfat subyektlərinin kapitalında iştirakını, demək olar ki, 4 dəfə artırmaq niyyətindədir.
Bankın portfeli aşağıdakı kimi diversifikasiya olunub, 71,35% layihə maliyyələşməsinə, 17,04% orta və kiçik sahibkarlığın inkişafına, 9,18% ticarət maliyyələşməsinə, 2,43% isə, kapitalda iştiraka yönəlib.
Strategiyasına əsasən, QDTİB kapitalda iştirak payını portfelin 10%-nə qədər artırmağa hazırdır. Bankla əməkdaşlıqdan bu günədək Azərbaycanla bu istiqamətdə yalnız bir razılaşma imzalanıb. QDTİB Azərbaycan Mikromaliyyələşmə Bankının səhmdarıdır və 25,55%-lik səhm paketinə malikdir.
Vitse-prezidentin sözlərinə görə, hazırda Azərbaycanda səhmdar kapitalına investisiyaların həcminin genişləndirilməsinə dair müzakirlər aparılır. Bu öz əksini ölkə üzrə yeni strategiyada da tapacaq. Bu strategiya çərivəsində, əməkdaşlığın yeni istiqamətləri, maliyyə ehtiyatlarının divesifikasiyası və maliyyənin həcminin artırılması nəzərdə tutulur.
QDTİB-in ümumi portfelinin böyük hissəsi (32,1%-i) istehsalat sahəsində layihələrin, 31% maliyyə institutlarının, 16% enerji sektorunun, 12,2% nəqliyyat sektorunun, 7,7% telekommunikasiya sahəsinin, 1% kənd təsərrüfatı, meşə təsərrüfatı və balıqçılığın maliyyələşməsinə yönəlib. Bankın vitse-prezidentinin sözlərinə görə, Azərbaycanda portfelin 75%-i bank sektoruna yönəlib.
Azərbaycan üzrə ümumi portfel 82 mln. dollar təşkil edir.
