Azərbaycan, Bakı / Trend müxbir İ.Xəlilova / "Bank Respublika"dan cümə günü verilən məlumatda bildirilir ki, Asiya İnkişaf Bankı (AİB) və "Bank Respublika" səhmdar- kommersiya bankı arasında dekabrın 17-də 10 mln. dollar həcmində subordinasiya edilmiş kreditin ayrılmasına dair müqavilə imzalanacaq. Kredit libor+ marja faiz dərəcəsi ilə 7 illik müddətə verilir.
"Beynəlxalq maliyyə bazarlarında subordinasiya edilmiş kreditlər üzrə faiz dərəcələri 10% civarında təşkil edir" - deyə bankdan bildiriblər.
Asiya İnkişaf Bankının nümayəndəliyindən verilən məlumata görə, imzalanma mərasimi AİB-in özəl sektor məsələləri üzrə direktoru Uilyam Uilyamsın dekabrın 14-də baş tutacaq səfəri çərçivəsində keçiriləcək.
Kredit vəsaiti ikinci səviyyəli kapitala daxil ediləcək, bu səbəbdən də "Bank Respublika" bu vəsaitləri sərbəst şəkildə istifadə etmək imkanına malikdir. Bankın prioritetləri nəzərə alınmaqla bu kreditlər mikro, kiçik və orta sahibkarlığın maliyyələşdirilməsi üçün istifadə olunacaq.
Bu kredit xətti nəzərə alınmaqla, Asiya İnkişaf Bankının "Bank Respublika" üzrə portfeli 15 mln. dollar təşkil edir. 5 mln. manat həcmində ilk kredit xətti 2007-ci ilin əvvəlində açılıb və bu vəsait artıq mənimsənilib. Kredit vəsaiti ticarət maliyyələşməsi, kiçik və orta sahibkarlığın inkişafı üçün nəzərdə tutulmuşdu.