Azərbaycan, Bakı/ Trend , müxbir İ.Xəlilova/ 2007-ci ilin əvvəlindən Azərbaycanın milli valyutasının kursu 3% möhkəmlənib. Azərbaycan Milli Bankının 2008-ci ildə pul siyasətinin əsas istiqamətlərinə dair dekabrın 28-də açıqlanan məluamatına əsasən, manatın möhkəmlənməsinin güclü templərinin saxlanılması AMB-nin valyuta bazarına müdaxiləsi nəticəsində baş verib. Milli Bank il ərzində 1.7 mlrd. dollar sterilizasiya edib. AMB-dən hesab edirlər ki, neft gəlirlərindən ölkənin sosial-iqtisadi inkişafında fəal istifadəsi, qeyri-neft sektorunda xarici kapitaldan istifadə nəticəsində təklif tələbi ötüb. Bununla əlaqədar, müdaxilə yolu ilə AMB valyutaya olan tələbatı ödəyə bilib. Milli Bank sabitləşdirsə də, inflyasiyanın səviyyəsindəki fərq 11 ay ərzində real effektiv kursun 3.1% möhkəmlənməsinə səbəb olub. Lakin bu, qeyri-neft sektorunun rəqabət qabiliyyətliliyinin zəifləməsinə səbəb olmayıb və 2000-ci ildən qeyri-neft sektoru üzrə real effektiv kurs 13% ucuzlaşıb. Öz növbəsində, bu, ortamüddətli dövr ərzində xarici ticarətin əlverişli olaraq qaldığını sübut edir. Milli Bank hesab edir ki, 2008-ci ildə də milli valyutanın möhkəmlənməsinə təzyiq davam edəcək. Buna səbəb ölkənin xarici investisiyalar üçün cəlbediciliyinin artması, həmçinin, növbəti il üçün makroiqtisadi çərçivələrin qəbul edilməsidir. Bu şəraitdə AMB kursun nizamlanması rejimini saxlamaq və valyutanın sterilizasiyası üzrə fəal əməliyyatlar aparmaq niyyətindədir.
...