Azərbaycan, Bakı/ Trend , S.Babayeva/ Yanvarda Bakıya Quraq rayonlarda kənd təsərrüfatı araşdırmaları beynəlxalq mərkəzi İCARDA-nın Mərkəzi Asiya və Cənubi Qafqaz üzrə yeni koordinatoru Kristofer Martiusun səfəri gözlənilir. O, bu vəzifəni növbəti ayın 1-ci günündən icra etməyə başlayacaq. Bu barədə Azərbaycan Kənd Təsərrüaftı Nazirliyinin elmi-aqrar mərkəzindən məlumat veriblər. "Səfər əsasən tanışlıq xarakteri daşıyacaq"-nazirlikdən bildiriblər. Martius Kənd Təsərrüfatı Nazirliyinin müxtəlif bölmələri ilə görüşlər keçirəcək, əməkdaşlığın inkişaf perspektivlərini, birgə layihələrin reallaşdırılmasının mümkünlüyünü müzakirə edəcək. 1977-ci ildə təsis edilən İCARDA bütün dünya üzrə yerləşmiş 15 mərkəzdən biridir. O, Beynəlxalq kənd təsərrüfatı araşdırmaları üzrə Konsaltinq qrupu (Consultative Group on International Agricultural Research (CGIAR)) tərəfindən dəstəklənir. Təşkilatın baş ofisi Aleppodadır (Suriya). Təşkilat əməkdaşlıq şəbəkəsi vasitəsilə milli, regional və beynəlxalq institutlar, universitetlər, QHT, inkişafda olan ölkələrin nazirlikləri, sənaye ölkələrindəki müvəffəqiyyətli araşdırma mərkəzləri ilə işləyir. Ötən illərdə Azərbaycanda İCARDA-nın maliyyə yardımı ilə "Tərtər rayonunda təcrübə sahəsində fermer təsərrüfatlarının işitrakı ilə soya bitkilərinin intensiv yetişdirilməsi üçün yaxşılaşdırılmış suvarma texnologiyaların yoxlanılması" , "Fermerlərin cəlb edilməsi ilə Şamaxı rayonu dağlarının ətəklərində meyvə bağlarının yetişdirilməsi texnologiyalarının araşırılması" kimi layihələr reallaşdırılıb. Təşkilatın vəsaitləri hesabına azərbaycanlı mütəxəssislər dövri olaraq xaricdə müxtəlif treninqlərdə iştirak edirlər.
...