Azərbaycan, Bakı / Trend , müxbir S.Babayeva / Azərbaycanda 2008-ci ildə "quş qripi"nin qarşısının alınması üzrə birinci monitorinqin keçirilmə tarixi müəyyən edilib. Kənd Təsərrüfatı Nazirliyi yanında Dövlət Baytarlıq Xidmətindən verilən məlumata görə, monitorinq yanvarın 14-də başlayacaq və bir həftə davam edəcək.
Monitorinq Abşeron yarımadası, Xəzər sahili zolaq, Dəvəçi, Salyan, Ağcəbədi və Lənkəranın Milli park ərazilərini əhatə edəcək. Monitorinqi Baytarlıq Xidməti, Ekologiya və Səhiyyə nazirlikləri, o cümlədən Azərbaycan Ovçular Cəmiyyətinin mütəxəssisləri aparacaqlar.
2007-ci ildə ümumilikdə 12 analoji monitorinq keçirilib, 8 mindən yuxarı çöl və ev quşu nümunəsi tədqiq edilib. Nümunələrin heç birində virus daşıyıcısı aşkar olunmayıb.
Buna baxmayaraq, bu gün Azərbaycanda 2005-ci ildə çöl quşlarının istifadəsi və satışına qoyulan qadağa qüvvədədir. Ölkənin bütün sərhəd-keçid baytarlıq məntəqələri nəinki "quş qripi", həmçinin Afrika taunu, dabaq və digər xəstəliklərin yayılmasının qarşısının alınması üçün gücləndirilmiş iş rejimində fəaliyyət göstərir.