Azərbaycan, Bakı, 24 yanvar / müxbir İ.Xəlilova/ ABŞ-ın Beynəlxalq İnkişaf Agentliyi (USAİD) Azərbaycan Milli Bankına texniki yardım göstərilməsi üçün Azərbaycana beş istiqamətdə məsləhətçilər göndərib. Bu barədə AMB-nin Statistika və Araşdırmalar Departamentinin direktoru Emin Hüseynov məlumat verib.
Onun sözlərinə görə, məsləhətçi xidmətləri insan ehtiyatlarının idarə edilməsi, AMB üçün sikkə siyasətinin hazırlanması və implementasiyası, bank nəzarəti, çirkli pulların yuyulması, informasiya texnologiyaları istiqamətində göstəriləcək. Xarici ekspertlər maliyyə sabitliyi analizinin metodologiyası, Milli Bankın mərkəzi məlumat bazasında diaqnostik analiz, ekonometrik modelləşmə, makroiqtisadi nəzəriyyə üzrə ümumi treninqlərin keçirilməsində kömək edəcəklər. Bununla yanaşı, məsləhətçilər özləri AMB-də gedən prosesləri izləməli, zəif yerləri aşkara çıxarmalı və sonra qrafik təqdim etməlidirlər.
Texniki yardım iki il müddətinə hesablanıb.
USAID AMB-yə artıq ikinci ildir ki, texniki yardım göstərir. Birinci yardım proqramı 2007-ci ilin iyununda başa çatıb. Yeni proqram çərçivəsində texniki yardım təkcə Milli Bank üçün deyil, ölkənin İqtisadi İnkişaf Nazirliyi üçün də nəzərdə tutulacaq.
USAİD-lə artıq araşdırmalar və statistika sahəsində mövcud vəziyyətin və təlabatın qiymətləndirilməsi istiqamətində iş aparılıb. Milli Banka maliyyə və sikkə üzrə statistika və araşdırmalar, bu sahələrdə siyasətin formalaşdırılması və reallaşdırılması, kadrların hazırlanması və ixtisasartırma sahəsində tövsiyələr verilib. Həmçinin, Aparıcı Mərkəzi bankların (İngiltərə, Fransa, Hollandiya) mütəxəssislərinin iştirakı ilə treninqlər seriyası təşkil edilib.