Azərbaycan, Bakı, 29 yanvar / Trend , müxbir S.Babayeva / Azərbaycanın Kənd Təsərrüfatı Nazirliyi yanında Dövlət Baytarlıq Xidməti Nic (ölkənin Qəbələ rayonu) kəndində Afrika taunu virusunun əmələ gəlmə mənbəyini araşdırır. Çərşənbə axşamı Baytarlıq Xidmətindən bildirilib ki, yanvarın 28-dən bu kənddə karantin qoyulub.
"Bizim mütəxəssislər kəndə ezam olunublar və virusun əmələ gəlmə səbəblərini araşdırırlar" - Dövlət Xidmətində olan mənbə deyib.
Dövlət Xidməti tərəfindən Nic kəndində 25-30 baş donuz məhv edilib və zərərsizləşdirilib. Ümumilikdə kəndin ərazisindəki təsərrüfatlarda 4,6 min baş donuz saxlanılır.
Donuzların Afrika taunu (Pestis africana suum) - kəskin virus xəstəliyidir. Retikul-endotelial sisteminin zədələnməsi ilə səciyyələnir. Təbii şəraitd bütün yaşlarda ev və vəhşi donuzlar xəstəliyə həssasdır. Təbii yoluxma xəstə və sağlam donuzların və virus daşıyıcılarının əlaqədə olması nəticəsində baş verir. İnfeksiya yem, otlaq, nəqliyyat vasitələri vasitəsilə yayılır. Həşaratlar, yırtıcı quşlar, vəhşi heyvanlar virus daşıyıcıları ola bilərlər. İnkubasiya dövrü - 2-5 gündür. Xəstəliyin müalicəsi hələ hazırlanmayıb. Xəstəlik yüksək təhlükə dərəcəsinə malik olduğundan və çox tez yayıldığından profilaktik tədbirlər xəstəlikdə şübhəli sayılan heyvanların dərhal təcrid edilməsinə yönəlib.
Azərbaycanda Afrika taunu xəstəliyi ilk dəfədir ki, qeydə alınıb.
2007-ci ildə virus Gürcüstan və Ermənistanda aşkar edilib. Gürcüstanda Afrika taunu virusunun yayılması səbəbindən Azərbaycanın ötən il iyunun 7-də bu ölkədən donuz ətinin idxalına qoyduğu qadağa qüvvədə qalır. Dağlıq Qarabağ münaqişəsi səbəbindən Ermənistanla heç bir iqtisadi əlaqə mövcüd deyil.
"Əgər mütəxəssislər kəndin digər təsərrüfatında virusun yayılması təhlükəsini aşkarlasalar, onun qarşısını almaq üçün lazımi sayda donuz məhv edilə bilər" - Dövlət Xidmətindən deyiblər.
Kəndə bütün giriş və çıxışlar mütəxəssis-baytarların nəzarəti altındadır.
Üsula əsasən, əgər xəstəliyin əlavə qaynaqları aşkarlanmasa, karantin bir aydan sonra götürülə bilər. Lakin bu ərazidən məhsulların çıxarılmasına qoyulan qadağa altı ay qüvvədə qala bilər.
Ölkədə donuzçuluq təsərrüfatı Zaqatala, Şəki, Balakən, Gəncə və Bakı ətrafında mövcuddur.