Azərbaycan, Bakı, 05 fevral/ " , müxbir Ü.İsmayılova/ Azərbaycanın Sanitar-epidemiloji Mərkəzi Səhiyyə Nazirliyinə "İstehlakçı hüququları haqqında" Qanuna dəyişikliklər edilməsi haqqında təkliflər paketi təqdim edib. Bu barədə çərşənbə axşamı Qida gigiyenası şöbəsinin direktoru İmran Abdullayev məlumat verib.
"Mövcud qanun istehlakçıların hüquqlarını kifayət qədər qorumur və bazarda keyfiyyətsiz qida məhsulları satmağa imkan yaradır" - Abdullayev bildirib.
Abdullayevin sözlərinə görə, təkliflərə əsasən, qanun pozanlara qarşı tədbirlərin gücləndirilməsi, cərimələrin məbləğinin hazırkı 44-66 manatdan 200-400 manatadək artırılması nəzərdə tutulur.
Abdullayev 2007-ci ildə Mərkəzin mindən çox sahibkarı cərimələdiyini, 33 şadlıq sarayına xəbərdarlıq edildiyini bildirib. Buna baxmayaraq, qanunu pozanlar cərimələri ödəyir və istehlakçılara keyfiyyətsiz qida məhsulları təklif etməyə davam edirlər.
"Düşünürəm ki, istehlakçılara sağlamlıq üçün təhlükəli keyfiyyətsiz məhsulların satılması inzibati qanun pozuntusu deyil, cinayətkarlıqdır", - Abdullayev söyləyib.
Azərbaycanda "İstehlakçı hüquqları haqqında" Qanun 1995-ci il 19 sentyabrda qəbul edilib.
Əvvəllər qanuna dəyişiklik edilməsi təklifi ilə Azərbaycanın Azad İstehlakçılar İttifaqının rəhbəri Eyyub Hüseynov çıxış edib. O, qanunun qəbul edilməsindən 10 il keçdiyini və bu dövr ərzində ölkənin ərzaq bazarının dəyişdiyini, bunun isə qanuna dəyişikliklər edilməsinin vacibliyindən xəbər verdiyini hesab edir.