Azərbaycan, Bakı, 18 fevral/ " , müxbir İ.Xəlilova/ Dünya Bankı (DB) Sahil qəsəbəsindən Müşfiqdən keçməklə Z.Tağıyev qəsəbəsinədək uzunluğu təxminən 40 km. olan ikinci dairəvi yolun tikintisi layihəsinin hazırlanması üçün məsləhətçi cəlb edir. Bu barədə bazar ertəsi Azərbaycanın Nəqliyyat Nazirliyindən məlumat veriblər. Layihənin texniki sənədləşdirilməsinin hazırlanması bankın qrant vəsaitləri hesabına həyata keçiriləcək.
Tikinti işlərinin həyata keçirilməsi üçün bank Beynəlxalq Yenidənqurma və İnkişaf Bankının xətti ilə $50-56 mln. vəsait ayrımağı planlaşdırır.
Birinci dairəvi yol Bakını dövrələməklə çəkilib. Layihə $14,9 mln. məbləğində kredit ayıran Küveyt İnkişaf Fondu, $10 mln - Əbu-Dabi Ərəb İnkişaf Fondu və $3,5 mln. - Azərbaycan hökumətinin vəsaitləri hesabına reallaşdırılıb. Ərəb maliyyə institutlarının vəsaitləri dörd ili güzəştli dövr olmaqla 20 ilə, 2,5% illik faiz dərəcəsi ilə ayrılıb. Layihə $50 mln.-dək bahalaşması səbəbindən vəsaitlərin çatışmayan hissəsi Azərbaycan hökuməti tərəfindən ödənilib.
Layihənin dəyəri layihəçi - İordaniyanın "Arab Konsalt" şirkəti tərəfindən yolun təkrar texniki tədqiqatından sonra dəqiqləşdirilib. Layihənin bahalaşması kommunikasiyaların yerinin dəyişdirilməsi, həmçinin layihənin əvvəlki texniki-iqtisadi əsaslandırılmasında nəzərədə tutulmayan 5 km. uzunluğunda yol hissəsinin və bəzi digər infrastrukturun tikintisi ilə izah edilib. Layihənin genişləndirilməsi hesabına yolu yeni avtovağzal kompleksi ilə birləşdirəcək yeni yol ötürücüsünün tikintisi güman edilirdi. Bundan əlavə tikinti materialları və xidmətlərinin qiyməti 45 faiz artıb.
Hazırkı şəraitdə layihələrin dəyəri tikinti materiallarının qiymətinin artmasından əlavə, beynəlxalq kreditlər hesabına həyata keçirilən iş və xidmətlərə ƏDV tətbiq edilməsinə görə də bahalaşır.