Azərbaycan, Bakı, 14 mart/ Trend , müxbir İ.Xəlilova/ Azərbaycan hökuməti inflyasiyanın artım templəri ilə bağlı narahatdır. 2007-ci ildə inflyasiya 16,7 faiz təşkil edib. Bu barədə Azərabaycanın Baş naziri Artur Rasizadə hökumətin ötən il ərzində fəaliyyətinin yekunları haqqında hesabatını Milli Məclisə təqdim edərkən bildirib.
İstehlak qiymətləri indeksinin belə artım tempi qloballaşma fonunda dünya bazarlarında baş verən proseslərlə əlaqədardır. Baş nazirin sözlərinə görə, neft, ərzaq və digər malların qiymətlərinin artması Azərbaycanın idxalının bahalaşmasına səbəb olub.
Bununla yanaşı, ölkənin sürətli iqtisadi inkişafı ilə bağlı olaraq, bir çox sosial və infrastruktur layihələrinin reallaşdırılması, büdcə xərclərinin, pul kütləsinin, həmçinin, əhalinin alıcılıq qabiliyyətinin artması inflyasiyanın artmasına gətirib. Yaranmış vəziyyətdə əsasə vəzifə əhalinin pul gəlirlərinin inflyasiyanı üstələməsi üçün onların artımını təmin etmək olub.
"Ötən il pul gəlirləri istehlak qiymətləri indeksini 2,4 dəfə ötüb və hökumət bu tendensiyanı 2008-ci ildə də saxlamaq niyyətindədir", - Rasizadə bildirib.
Onun sözlərinə görə, inflyasiyanın artım tempinin məqbul səviyyədə saxlanılması üçün dövlət rəhbəri antiinflyasiya tədbirlərinin gücləndirilməsi üzrə tapşırıq verib. Onların arasında o, ölkədən kapitalın çıxarılması üçün rejimin liberallaşdırılmasını, beynəlxalq ekspertiza nəzərə alınmaqla, Rəqabət haqqında Məcəllənin hazırlanması və digər tədbirləri göstərib.
Azərbaycanın İqtisadi İnkişaf Nazirliyinin proqnozlarına görə, 2008-ci ildə inflyasiya 12-14 faiz səviyyəsində qoyulub.
Məqalə müəllifinin ünvanı: [email protected]