Azərbaycan, Bakı, 31 mart / Trend , müxbir S.Əliyev/ Bu gün Tbilisidə Bakı-Tbilisi-Qars marşrutu üzrə dəmiryolu əlaqəsinin açılması ilə bağlı layihə ekspertlərinin iclası öz işinə başlayıb. Bu barədə Azərbaycanın Nəqliyyat Nazirliyindən məlumat verilib.
Görüş zamanı bu marşrut üzrə dəmiryolu əlaqəsinin açılması layihəsinin reallaşdırılmasının gedişatının müzakirə olunması nəzərdə tutulub. Dəmiryolu hissəsinin tikintisinin 2010-cu ildə başa çatdırılması planlaşdırılır.
Bakı-Tbilisi-Qars dəmiryolu sahəsinin tikintisi üzrə layihə büdcəsi 2008-ci il üçün 107 mln. dollar həcmində müəyyən olunub.
Gürcüstanda tikinti layihəsi üzrə tenderin qalibi olan Azərbaycanın "Azərinşaatservis" tikinti şirkəti artıq hazırlıq işlərini başa çatdırıb. Texnika və digər qurğular əldə olunub. Artıq dəmiryolunun çəkilməli olacağı torpaq sahələrinin bir hissəsi əhalidən alınıb.
Şirkətə artıq 24 mln. dollar ayrılıb. "Azərinşaatservis"lə bağlanan müqavilənin ümumi dəyəri 79 mln. dollar təşkil edir. İşlərin tam olaraq 2009-cu il oktyabın 1-nə qədər başa çatdırılması nəzərdə tutulub.
Gürcüstanda tikinti və layihə işlərinin maliyyələşdirilməsi Azərbaycanın 200 mln. dollarlıq kredit vəsaitləri hesabına həyata keçirilir.
"Bakı-Tbilisi-Qars" layihəsi çərçivəsində yeni 105 kilometrlik dəmiryolu qolunun tikintisi planlaşdırılır. Bunun 76 km Türkiyə ərazisindən, 29 km isə Gürcüstan ərazisindən keçəcək.
Bundan əlavə, Gürcüstanda yük daşınma gücünü ildə 15 mln. tona çatdırmaq məqsədilə 183 km-lik Axalkalaki-Marabda-Tbilisi dəmiryolu sahəsi yenidən qurulacaq. Həmçinin Axalkalakidə Gürcüstanda mövcud olan xətlərdə Avropa standartlarına uyğun qatarların keçid məntəqəsinin tikilməsi planlaşdırılır. Layihə 422 mln. dollar, infrastrukturla birgə 600 mln. dollar həcmində dəyərləndirilir.