Azərbaycan, Bakı, 03 aprel/ Trend , müxbir İ.Xəlilova/ Azərbaycanın Milli Bankı (AMB) ölkənin növbəti üç-dörd ilə hesablanmış bank sektorunun inkişafı strategiyasının hazırlanmasına başlayıb. Bu barədə cümə axşamı AMB-nin kredit təşkilatlarının fəaliyyətinə nəzarət üzrə Departamentinin direktoru Rəşad Orucov məlumat verib.
Strategiyada mövcud bank qanunvericiliyinin yaxşılaşdırılması, bank infrastrukturunun təkmilləşdirilməsi, bank sisteminin institusional inkişafı nəzərdə tutulur.
"Bundan əlavə, hazırda kapitalın artırlması və bu prosesin səmərəliliyi imkanları öyrənilir. Lakin, yeni bank strategiyasında yalnız kapitallaşmaya olan tələblərin (aktivlərin keyfiyyəti və kapitalın adekvatlılığı) dəyişdirilməsi mümkündür", - Orucov bildirib.
Kapitalın hazırki səviyyəsi orta Avropa səviyyəsi kimi qiymətləndirilir. O, bir çox ölkələrdəkindən yüksək olsa da, dinamik inkişaf edən iqtisadiyyat şəraitində, ölkənin bank sektorunun kapitallaşması üçün kifayət hesab edilmir.
Bu gün bankların kapitallarının artırılması qrafiki yoxdur. Belə ki, 10 milyonluq həddə çatılması üzrə sonuncu planka 2007-ci il iyulun 1-də müəyyən edilib və onu da bütün banklar yerinə yetirməyiblər. Gələcəkdə bank sistemində risklərin artması ilə əlaqədar, kapitalın artırılmasına zərurət yaranır. Bu, bank göstəricilərinin yüksək artım templəri ilə əlaqədardır və banklar bu istiqamətdə öz siyasətlərini fərdi qaydada qururlar.
Azərbaycanın bank sistemi fəal xarici kreditlər və ölkəyə səhmdar kapitalının cəlb edilməsi nəticəsində, 2007-ci ildə inkişafının ən yüksək templərinə çatıb. İl ərzində bank aktivləri 72 faiz, öhdəlikləri - 59 faiz, o cümlədən depozitlər 48 faiz artıb.
Belə inkişaf templəri aparıcı bankların göstəricilərinin artması nəticəsində olub; onların artım templəri sistem üzrə orta göstəriciləri iki dəfə ötür.
Bankların artan ehtiyatları iqtisadiyyatın qeyri-neft sektorunda sərmayə təlabatlarının maliyyələşdirilməsinə yönəldilib və bu, ortamüddətli perspektivdə təklifin artmasının stimullaşdırılması ilə yanaşı, makroiqtisadi tarazlığın formalaşdırılması üçün əlverişli şərait yaradıb.Ötən il kredit yatırımlarının artım templəri 83 faiz təşkil edib, uzunmüddətli kreditlər 2,5 dəfə artıb.
Qloballaşma riskləri nəzərə alınmaqla, 2008-ci ildə AMB-nin fəaliyyət strategiyasında əsas istiqamət maliyyə sabitliyinin qorunması olacaq. Bununla əlaqədar, bankların xarici və daxili şoklara immunitetinin gücləndirilməsi, korporativ idarəetmə sisteminin tətbiqinin genişləndirilməsi, yeni texnologiyaların tətbiqi, o cümlədən bank risklərinin idarə edilməsi sisteminin təkmilləşdirilməsi prosesində meydana gələn risk zonalarının idarəetməyə verilməsi nəzərdə tutulur.
2008-ci il yanvarın 1-də müştərək bank aktivləri 6725,7 mln. manat, kredit yatırımları - 4553,7 mln. manat, əhalinin əmanətləri - 1 468,4 mln. manat, bankların müştərək kapitalları - 1009,1 mln. manat təşkil edib.
Müəlliflə əlaqə saxlamaq üçün elektron ünvan: [email protected]