Azərbaycan, Bakı, 06 may/ Trend , müxbir Ü.İsmayılova/Azərbaycanın sığorta bazarı öz dinamik artımı ilə əcnəbi şirkətləri cəlb edir. Bu barədə çərşənbə axşamı Azergarant Sığorta Şirkəti İdarə Heyətinin sədr müavini Şükür Hüseynov məlumat verib.
Hüseynovun sözlərinə görə, əcnəbi şirkətlərinin marağının artmasının səbəblərindən biri martın 15-də qüvvəyə minən və bir şirkətin kapitalında 49 faizlik iştirak limitini ləğv edən "Sığorta fəaliyyəti haqqında" yeni Qanundur. 49 faizlik bu limit bütün şirkətlərin ümumi kapitalına qoyulub.
Apreldə Bakıda Rusiyanın ən iri sığorta şirkətlərindən olan "ROSNO"nun nümayəndəliyi açılıb. Şirkət rəhbərləri nümayəndəliyin açılışında bildirib ki, bazar öyrənildikdən sonra, yaxın üç ildə o şirkətə çevriləcək.
Azərbaycanda Rusiyanın MALAKUT və İNQOSSTRAX kimi şirkətlərinin nümayəndəlikləri fəaliyyət göstərir.
"Əcnəbi investorlar Azərbaycan bazarını investisiya baxımından cəlbedici hesab edirlər və buna görə də, biznesin genişlənməsi üçün vəsait yatırırlar", - Hüseynov bildirib.
Azərbaycanda minimal Nizamnamə kapitalı 1 mln. manat olan 28 sığorta və bir təkrarsığorta şirkəti var.
Müəlliflə əlaqə saxlamaq üçün elektron ünvan: [email protected]
