Azərbaycan, Bakı, 08 may/ Trend , müxbir İ.Xəlilova/ Azərbaycan prezidenti Əhalinin Sosial Müdafiəsi Dövlət Fondunun (ƏSMDF) 2008-ci il büdcəsinə düzəlişləri təsdiq edib. Düzəlişlərə əsasən, fondun gəlirləri və xərcləri hər maddə üzrə 136,867 mln. manat artaraq 1 405,515 mln. manata çatıb.
Dəyişikliklərə əsasən, fondun əlavə gəlirlərinin 74,5 faizi sosial sığorta ödəmələri üzrə yığımların artırılması, 24,5 faizi dövlət büdcəsindən transfertlərin artması hesabına təmin ediləcək. Təsdiq olunmuş büdcədə məcburi sosial sığorta üzrə daxilolmalar 11,1 faiz - 1019,015 mln. manat, dövlət büdcəsindən transfertlər isə 10 faiz - 385 mln. manatadək artıb.
Dövlət Neft Fondunun xərclər strukturunda 131,1 mln. manat həcmində əlavə xərclər əhaliyə pensiya və müavinətlərin verilməsinə, qalan 5,767 mln. manat isə fondun saxlanılması xərclərinin artırılmasına, pensiya ödəmələrinə göstərilən bank xidməti üzrə xərclərin artırılmasına və digər məqsədlərə sərf ediləcək.
2008-ci ildə Fond əhaliyə pensiyaların verilməsi üçün 1348,513 mln. manat ayrımağı planlaşdırır. Bundan əlavə, 2008-ci il yanvarın 1-nə ƏSMDF-in mərkəzi aparatı və yerli orqanlarının hesabında qalan 1 975 min manat məbləğində vəsait fondun 2008-ci il üçün xərclərinin maliyyələşdirilməsi məqsədilə büdcəyə yönəldiləcək.
Mayın 8-nə olan rəsmi məzənnə - 0,8292 AZN/USD
Müəlliflə əlaqə saxlamaq üçün elektron ünvan: [email protected]