Azərbaycan, Bakı, 16 may/ Trend , müxbir Ü.İsmayılova/ Azərbaycanın Əmək və Əhalinin Sosial Müdafiəsi Nazirliyi Dünya Bankı ilə birgə reallaşdırılan "Sosial müdafiənin inkişafı" layihəsi çərçivəsində, sosial iqtisadiyyat üzrə tərəfdaş ölkələrin təcrübəsini öyrənir. Bu barədə cümə günü Əmək Nazirliyinin beynəlxalq əməkdaşlıq şöbəsinin rəhbəri Elnur Sultanov məlumat verib.
"Nazirlik, əsasən, Türkiyə, Almaniya və Hollandiyanın təcrübəsini öyrənir. Son aylarda bu ölkələrlə qarşılıqlı əməkdaşlıq üzrə memorandum imzalanıb",- Sultanov bildirib.
Sultanov bildirib ki, nazirlik imzalanan memorandumlarda "Sosial müdafiənin inkişafı" layihəsi çərçivəsində, iqtisadiyyatın islahatlara daha çox ehtiyacı olan sahələrini göstərir.
Sultanovun sözlərinə görə, layihənin DB Direktorlar Şurasında mayın 27-də təsdiqlənəcəyi gözlənilir. Onun reallaşdırılmasına payızdan başlanılacaq.
Layihənin dəyəri $40 mln. məbləğində hesablanıb. DB bu məbləğin $25 milyonunu öz üzərinə götürəcək. Layihənin müddəti beş ildir və dörd komponentdən ibarətdir: birinci - məşğulluq sisteminin tam müasirləşdirilməsi, məşğulluq xidmətlərinin işinin təkmilləşdirilməsi, ikinci - sosial təminatı sistemi siyasətinin formalaşdırılması, üçüncü - pensiya sisteminin müasirləşdirilməsi və dördüncü - layihənin idarə edilməsi.
Müəlliflə əlaqə saxlamaq üçün elektron ünvan: [email protected]
