Azərbaycan, Bakı, 06 avqust/ Trend Cap , müxbir M.Kərimova/ Avropa İttifaqı Cənubi Qafqaz respublikalarında suyun keyfiyyətinin və ilk növbədə, sərhədlərarası çay hövzələri sularının monitorinqi sahəsində texniki yardım layihəsinə başlayır.
Layihənin vəzifələrinə aşağıdakılar daxildir: Avropa İttifaqına üzv ölkələrin təcrübəsinə müvafiq olaraq, su ehtiyatlarının keyfiyyət monitorinqinin qurulmasında üç Cənubi Qafqaz ölkəsi - Gürcüstan, Azərbaycan və Ermənistana yardım; sərhədlərarası çay sularının birgə monitorinqi. Ölkələrə su ehtiyatlarının və çay hövzəsində suyun keyfiyyətinin idarə edilməsi planının hazırlanmasında və Avropa İttifaqının su çərçivə direktivinin yanaşmalarından istifadə etməklə qərar qəbulu sisteminin təkmilləşdirilməsində də yardım göstəriləcək.
Layihə iki iri Avropa şirkətinin - Eptisa (İspaniya) və Grontmij-CarlBro (Danimarka-Hollandiya) Şirkətləri Konsorsiumu tərəfindən yerinə yetiriləcək. Hazırda real vəziyyətin qiymətləndirilməsi və layihənin optimal iş proqramının hazırlanması üzrə başlanğıc faza gedir.
Ölkə-benefisiarların hər birinə, gözlənildiyi kimi, əlavə olaraq suyun keyfiyyətinin bioloji və kimyəvi monitorinqi üçün müasir avadanlıq gətiriləcək. Avadanlığın ümumi dəyəri təqribən 1,5 mln. avrodur,- layihənin nümayəndələri bildiriblər.
Azərbaycanda layihədə, əsasən, üç struktur - Ekologiya və Təbii Sərvətlər Nazirliyi, "Azərsu" SC və "Meliorasiya və su təsərrüfatı" ASC iştirak edəcək.