Azərbaycan, Bakı, 05 sentyabr/ Trend , müxbir Ü.İsmayılova/"Azərbaycanda, səkkizi şirkət, qalanı fiziki şəxslər olmaqla, 100-dən çox qiymətləndirici işləyir", - cümə günü Azərbaycan Qiymətləndiricilər Cəmiyyətinin icraçı direktoru Elçin Səmədli deyib.
Ekspertin fikrincə, Azərbaycanda qiymətləndiricilərin sayı 2002-ci ildə qiymətləndirmə fəaliyyətinin lisenziyalaşdırılmasının ləğvindən sonra xeyli artıb ki, bu da qiymətləndiricilərin işinin keyfiyyətinə təsir edib. Hazırda bütün sanballı firma, bank, sığorta şirkətləri keyfiyyətin zəmanəti üçün məşhur qiymətləndirmə şirkətləri ilə işləyir.
"Dünyada heç bir sahə qiymətləndiricilərsiz ötüşmədiyi halda, Azərbaycanda onlar, əsasən, daşınmaz əmlak sahəsində işləyirlər", - Səmədli vurğulayıb.
Səmədlinin nəzərincə, hazırda Azərbaycanda bazarı əhatə edə biləcək peşəkar qiymətləndirici təxminən 20 nəfərdir. Gələn il Azərbaycan Dövlət İqtisad Universitetinin qiymətləndirmə fakültəsinin ilk məzunları olacaq.
İxtisasın artırılması üçün Qiymətləndiricilər Cəmiyyəti ABŞ-ın Beynəlxalq İnkişaf Agentliyinin (USAID) və Beynəlxalq Maliyyə Korporasiyasının dəstəyi ilə "Orta Asiyada və Azərbaycanda yaşayış evləri sahəsinin maliyyələşdirilməsinə texniki yardım"layihəsi çərçivəsində seminar və kurslar keçirir.
Səmədlinin sözlərinə görə, Azərbaycanda bu sahə 1995-ci ildə qəbul edilmiş "Qiymətləndirmə fəaliyyəti haqında"Qanun ilə tənzimlənir. Bu Qanun indi üçün yaxşı işlənmiş olsa belə, illər ötdükcə hər şey dəyişir və təkmilləşir. Bu məqsədlə Qiymətləndiricilər Cəmiyyəti bu Qanuna 14 əlavə və dəyişiklik hazırlayıb ki, onlar da baxılmaq üçün parlament komissiyasına təqdim edilib.
Hazırlanmış təkliflərə qiymətləndiricilərin ixtisasının yaxşılaşdırılması, qiymətləndiricilər üçün cərimə və qadağaların tətbiqi sistemi də daxildir.
Azərbaycanda qiymətləndirmə fəaliyyətinə nəzarət edən dövlət orqanı Iqtisadi Inkişaf Nazirliyidir ki, faktiki olaraq, bu səviyyədə qanunvericilik bazası və nəzarəti ilə məşğuldur, qalan digər məsələləri Qiymətləndiricilər Cəmiyyəti reallaşdırır.
Azərbaycanın Qiymətləndiricilər Cəmiyyəti 1997-ci ildə qeydə alınıb. Bu, ölkə ərazisində fəaliyyət göstərən bütün qiymətləndiriciləri birləşdirən ictimai təşkilatdır.
