Azərbaycan, Bakı, 06 oktyabr / T , müxbir Ü.İsmayılova/ Cənubi Şərqi Avropa ölkələri üzrə Beynəlxalq Əmək Müfəttişliyi Assosiasiyasının Sofiyada keçirilən birinci regional konfransında Azərbaycan strukturun bərabərhüquqlu üzvü olub, - bazar ertəsi Əmək və Əhalinin Sosial Müdafiəsi Nazirliyinin Beynəlxalq münasibətlər şöbəsinin rəhbəri Elnur Sultanov deyib.
"Azərbaycanın Assosiasiyaya üzv olmasında əsas məqsədi - əməyin mühafizəsi və gigiyenası üzrə beynəlxalq arenaya çıxmaqdır", - Sultanov bildirib.
Onun sözlərinə görə, Beynəlxalq Əmək Müfəttişliyi Assosiasiyasına üzvlük, Əmək Nazirliyi və Dünya Bankının (DB) birgə sosial layihəsi çərçivəsində həyata keçirilib.
Azərbaycan hökumətinin Dünya Bankı ilə "Sosial müdafiənin inkişafı" birgə layihəsi DB-nin iyunda keçirilmiş Direktorlar Şurasının iclasında təsdiq edilib. Layihənin payızda həyata keçirilməsi planlaşdırılıb. Onun dəyəri $40 mln. qiymətləndirilir. Onun $25 mln. DB öz üzərinə götürəcək. Lyihənin müddəti beş ildir. Layihəyə dörd komponent daxildir: əmək bazarının müasirləşdirilməsi, o cümlədən əmək qanunvericiliyinin, əməyin mühafizəsi sisteminin, məşğulluq idarələrinin işinin təkmilləşdirilməsi; sosial təminat sistemi siyasətinin formalaşdırılması; pensiya sisteminin müasirləşdirilməsi və layihənin idarə edilməsi.
Sultanov deyib ki, Assosiasiyaya Azərbaycanla bərabər Ukrayna və Moldova da daxil olub. Azərbaycan da digər ölkələr kimi, Assosiasiyanın bütün tədbirlərində iştirak etmək və dünyanın bütün ölkələrindən əməyin mühafizəsi və gigiyenası sahəsində məsləhətçiləri cəlb etmək üzrə tam hüquq alıb.
"Konfransın gedişində regional alyans yaradılıb və əməyin mühafizəsi, işçilərin hüquqlarınn qorunması və əmək şəraitinin yaradılması sahəsində təcrübə mübadiləsi üzrə qarşılıqlı əməkdaşlıqla bağlı bəyannamə imzalanıb", - Sultanov bildirib.
Beynəlxalq Əmək Müfəttişliyi Assosiasiyası (BƏMA) 1972 -ci ildə dünyada əmək şəraitini yoxlayan bütün təşkilatlara kömək məqsədilə yaradılıb. BƏMA-nın məqsədləri: BƏMA üzvlərinin peşəkar səviyyəsinin hərtərəfli artırılması; Əmək şəraitinin yoxlanılması, sağlamlığın qorunması və texniki təhlükəsizlik normalarının və eləcə də əmək məşğulluğuna aid digər qanunvericiliyin təmin edilməsi planında təcrübə mübadiləsi imkanlarının yaradılması; Əmək müşəttişliyinin nüfuzunun və effektivliyinin atırılması məqsədilə bütün tematik materialların konqres və konfranslarda geniş yayılması, onların şəxsi internet saytında yerləşdirilməsi və məlumat və digər informasiyaların yayılması; BƏMA üzvləri arasında, xüsusilə də regional şəbəkələr vasitəsilə regional səviyyədə əməkdaşlığın genişləndirilməsi və dərinləşdirilməsi.
