Azərbaycan, Bakı, 21 oktyabr/ Trend , müxbir İ.Xəlilova/ Almaniyanın Banklar Akademiyası Azərbaycan Milli Bankı nəzdində fəaliyyət göstərən Azərbaycan İpoteka Fondu (AİF) üçün Fondun gələcək fəaliyyət strategiyasını hazırlayır, - Beynəlxalq Maliyyə Korporasiyasının (BMK) Azərbaycan və Mərkəzi Asiyada ipoteka kreditləşdirməsi üzrə eksperti Qart Bedford (Garth Bedford) bildirib.
"İndi biz AİF ilə işləyir və ona növbəti mərhələnin - gələcək strategiyanın hazırlanmasında kömək edirik, - Bedford bildirib. - Bu mərhələdə Fonda kommersiya ipoteka kreditləşdirməsinin tətbiqi üzrə texniki dəstək göstərilir".
Onun sözlərinə görə, növbəti mərhələdə İpoteka Fonduna kommersiya ipotekasına keçid üzrə yardım göstəriləcək.
"Biz istərdik ki, Fondun fəaliyyəti mümkün qədər daha çox kommersiya əsasında olsun və bizim indi etdiklərimiz Fondun, maliyyələşdirmə üçün yalnız dövlət vəsaitlərini deyil, həm də özəl sektorun, xarici sərmayədarların vəsaitlərini cəlb etmək qabiliyyəti üzrə başlanğıc strategiyanın bir hissəsidir".
İpoteka istiqrazları sərmayələrin yatırılmasının variantlarından biri ola bilər və hazırda BMK "İpoteka istiqrazları haqqında" Qanunun hazırlanmasında Azərbaycan Milli Bankına kömək edir.
BMK ekspertinin sözlərinə görə, strategiyanın ilkin variantı 30 gündən sonra başa çatdırıla bilər. Bundan sonra o, Azərbaycan hökuməti və AMB tərəfindən təsdiqlənməlidir. Strategiya üzərində bilavasitə iş gələn ay başa çatdırılacaq.
Hazırda AİF-də subsidiyalaşdırılmış ipoteka modeli tətbiq olunur ki, bu da ehtiyatlarda ipoteka maliyyələşdirməsini məhdudlaşdırır. İmkanların genişləndirilməsi və əlavə vəsaitlərin cəlb edilməsi üçün Fondun əvvəlcə kommersiya ipoteka kreditləşdirməsi modelini tətbiq etməsi lazımdır.
BMK- nın layihəsinin əhatə etdiyi beş ölkədən ipoteka kreditləşməsi sahəsində öndə böyük ipoteka portfelinə malik Qazaxıstandır. Qalan ölkələr ipoteka bazarının inkişafının başlanğıc mərhələsindədir. Azərbaycanda ipoteka kreditləşdirməsi AİF vasitəsilə başlayıb. Fond ötən ilin ortalarında bankların maliyyələşdirilməsini dayandırıb.
Qanunvericiliyin təkmilləşdirilməsi və Azərbaycan İpoteka Fondunun institusional potensialının artırılması üzrə tədbirlər BMK-nın texniki yardım layihəsinin II fazası çərçivəsində aparılır. Layihə İsveçrənin iqtisadi əlaqələr üzrə Dövlət Katibliyi (State Secretariat for Economic Affairs - SECO) ilə birgə Maliyyə Korporasiyası tərəfindən maliyyələşdirilir. Regional olması və Mərkəzi Asiya və Azərbaycanı əhatə etməsinə baxmayaraq, SECO - nun vəsaitləri yalnız Azərbaycan üçün nəzərdə tutulub.
Müəlliflə əlaqə saxlamaq üçün elektron ünvan: [email protected]