Azərbaycan, Bakı, 28 oktyabr/ Trend , müxbir Ü.İsmayılova/ Azərbaycanın Mədəniyyət və Turizm Nazirliyi Turizm Sektorunun rəhbəri Aydın İsmiyev turizm biznesinin ötən yay üzrə göstəricilərini müsbət qiymətləndirib. Bu dövrdə ölkəyə gələn əcnəbi turistlərin sayı 200 min nəfər artıb.
İsmiyev, Əmək Nazirliyi nəzdində Baş Məşğulluq İdarəsi və Mədəniyyət və Turizm Nazirliyinin Turizm Sektorunun birgə təşkil etdiyi "Turizm sahəsində kadrların hazırlanması və onların işlə təminatı" "Dəyirmi masa"sında bildirib ki, Azərbaycanın turizm şirkətlərinin yay dövründə qarşılaşdığı yeganə problem səyahətin təşkilini çətinləşdirən yolların təmiridir.
2004 - 2008-ci illərdə Regionların Sosial-İqtisadi İnkişafı Dövlət Proqramı çərçivəsində, ölkədə Azərbaycanın Rusiya, Gürcüstanla sərhədləri istiqamətində, Bakı şəhərində yolların yenidən qurulması və yeni yolların çəkilməsi üzrə iş aparılır. İsmiyevin sözlərinə görə, 2007-ci ildə Azərbaycanda turizm sahəsinin gəlirləri 177,5 mln. manat, 2008 - ci ilin ikinci yarısında isə, 97 mln. mant təşkil edib ki, bu da ölkə iqtisadiyyatının bu sektorunun artımına dəlalət edir.
Nazirliyin sektor rəhbərinin sözlərinə görə, Azərbaycanda turizmin inkişafı məqsədilə, infrastrukturun yaxşılaşdırılması üzrə iş aparılır, otel biznesi fəal inkişaf edir.
Ölkədən kənarda Azərbaycanın turizm biznesinin təbliğatından danışan İsmiyev bildirib ki, bu məqsədlə Mədəniyyət və Turizm Nazirliyi bütün beynəlxalq turizm sərgilərində fəal iştirak edir. Bu sərgilərdə iştirakçıları Azərbaycanla və onun görməli yerləri, bu sahədəki xidmətlərlə tanış edirlər.
Dövlət Statistika Komitəsinin məlumatlarına əsasən, cari ilin birinci yarısında Azərbaycanda turizm fəaliyyətinin genişlənməsi nəticəsində, 2007-ci ilin analoji dövrü ilə müqayisədə, turizm şirkətlərinin gəlirləri 10,8 faiz - 7,9 mln. manatadək artıb.
Müəlliflə əlaqə saxlamaq üçün elektron ünvan: [email protected]
