Azərbaycan, Bakı, 06 noyabr/ Trend , müxbir Ü.İsmayılova/ "Azərbaycan banklarının yayda istehlak kreditləşdirməsini dayandırması ipoteka kreditləşdirməsinə təsir göstərib", - Daşınmaz Əmlakın Dövlət Reyestri Xidmətinin mətbuat katibi Yadigar Cəfərli cümə axşamı bildirib.
"Sentyabrda ipoteka kreditləşdirməsi üzrə müqavilələrin sayı, avqustla müqayisədə 60, iyulla müqayisədə isə, 54 faiz azalıb", - Cəfərli bildirib.
Yanvar - sentyabrda dövlət xidmətində ipoteka kreditləşdirməsi üzrə 14,54 min müqavilə qeydiyyata alınıb. Yanvarda müqavilələrin sayı 1,2 min, fevralda - 1,7 min, martda - 1,2 min, apreldə - 2 min, mayda 1,9 min, iyunda - 1,9 min, iyulda - 1,5 min, avqustda 2,1 min təşkil edib. Sentyabrda dövlət xidmətində 886 ipoteka kreditləşdirməsi müqaviləsi qeydiyyata alınıb.
"Hesab edirik ki, bu, ipoteka bazarının müvəqqəti azalmasıdır və Azərbaycan əhalisinin ipoteka kreditləşdirməsinə böyük marağı olduğundan, bankların istehlak kreditlərinin verilməsini bərpa etmələri ilə bazar tədricən fəallaşacaq", - Cəfərli bildirib.
Avqustdan etibarən, Azərbaycanda ipoteka kreditləşdirməsinin templəri azalıb, bəzi banklar bu istiqamətdə əməliyyatları dayandırıblar. Bankların kreditləşdirmə templərini azaltmaları, ik növbədə, dünya maliyyə bazarlarında böhranla izah olunur. Hazırda istehlak kreditlərinin verilməsi qismən bərpa edilib.
Müəlliflə əlaqə saxlamaq üçün elektron ünvan: [email protected]
