Azərbaycan, Bakı, 12 noyabr/ Trend , müxbir Ü.İsmayılova/ Azərbaycanın Daşınmaz Əmlakın Dövlət Reyestri Xidməti qanunsuz tikililərin vəziyyətini öyrənmək üçün Bakının Abşeron və Binəqədi rayonlarının bəzi yaşayış massivlərində inventarlaşdırma aparacaq", - çərşənbə günü Dövlət Xidmətindən biliriblər.
"İnventarlaşdırma qanunsuz tikililərin dövlət qeydiyyatını aparmağa imkan verəcək. Monitorinqdən sonra hökumətə bu məsələnin həlli üçün təkliflər veriləcək", - Dövlət Xidmətindən bildiriblər.
Təkliflərin hazırlanmasında Dünya Bankı ekspertlərinin məsləhətlərindən istifadə ediləcək. Bankın ekspertləri "Daşınmaz əmlakın qeydiyyatı" layihəsi çərçivəsində Bakıdadırlar.
Onlar artıq elektrik ötürücü xətlərin yaxınlığında olan tikililərə baxış keçiriblər.
"Azərbaycanda 400 mindən çox qanunsuz tikili qeydiyyata alınıb və onların yalnız yarısı texniki təhlükəsizlik qaydalarına cavab verir", - Daşınmaz Əmlakın Dövlət Reyestri Xidmətinin rəhbəri Arif Qaraşov əvvəllər bildirib.
"Ekspertlər tikintinin qəbul edilmiş standartlar əsasında aparıldığı qərarına gəlsələr, bu tikililər qanuniləşdiriləcək. Onların sahiblərinə kompensasiyaların ayrılması, ya da daha əlverişli yaşayış şəraitinə köçürülməsi məsələsi, təkliflər hökumətə təqdim edildikdən sonra həll ediləcək", - Qaraşov vurğulayıb.
Azərbaycan hökuməti və DB 2007-ci ilin iyulunda daşınmaz əmlakın vahid kadastrı sistemini birgə tətbiq etmək haqqında saziş imzalayıb.. Layihə dörd komponentdən ibarətdir - daşınmaz əmlakın qeydiyyatı; dövlət əmlakının idarə edilməsi və reyestri; baza xəritəçəkmə və torpaq kadastrı; treninqlər, siyasətin formalaşdırılması və layihənin idarə edilməsi.
Layihənin dəyəri 38,57 mln. dollardır. Bunun 30 mln. dolları DB-nin kreditinin payına düşür. Kredit ehtiyatları, beş il güzəştli dövr olmaqla, 20 il müddətinə ayrılıb.
Müəlliflə əlaqə saxlamaq üçün elektron ünvan: [email protected]
