Azərbaycan, Bakı, 13 noyabr/ Trend , müxbir İ.Xəlilova/ "İndiyədək Azərbaycanda sahibkarlığın inkişafına dövlət dəstəyi çərçivəsində, 7326 layihənin realizəsinə kreditlər qismində 333 mln. manat ayrılıb", - iqtisadi inkişaf naziri Şahin Mustafayev cümə axşamı 2009- cu ilin dövlət büdcəsi layihəsinin müzakirəsi üzrə Milli Məclisin plenar iclasında bildirib. Maliyyələşdirmə Sahibkarlığa Kömək Milli Fondu (SKMF) vasitəsilə həyata keçirilir.
Bu vəsaitdən kənd təsərrüfatı sahəsində 5355 layihənin maliyyələşdirilməsinə 101,2 mln. manat ayrılıb.
"Qarşıdakı illərdə özəl sektor üçün maliyyə dəstəyi vəsaitlərin xərclənməsinə nəzarətin yüksəldilməsi ilə artacaq", - nazir bildirib.
2009-cu ildə hökumət 80 mln. manat məbləğində büdcə ayırmaları və əvvəllər verilmiş vəsaitlərin qaytarılması hesabına, Milli Fond vasitəsilə maliyyələşdirmə həcmini 140-150 mln. manatadək iki dəfə artırmağı planlaşdırır.
2008 - ci ilin dövlət büdcəsində də SKMF üçün 80 mln. manat ayrılıb. Bu vəsaitin 6 mln. manatı NMR-dən olan sahibkarların maliyyələşdirilməsi üçün nəzərdə tutulub. Milli Fond bu il sahibkarlara 100 mln. manatdan çox kredit vəsaitinin ayrılmasının mümkün olacağını gözləyir.
Milli Fond güzəştli kreditləri 29 səlahiyyətli kommersiya bankı, bir bank olmayan kredit təşkilatı və dörd kredit birliyi vasitəsilə verir.
Bu il maliyyələşdirilən layihələrin 78 faizdən çox hissəsi regionların payına düşür, layihələrin 86 faizi istehsal yönlüdür.
Noyabrın 13-nə olan cari mübadilə məzənnəsi -- 0,8104 AZN/USD.
Müəlliflə əlaqə saxlamaq üçün elektron ünvan: [email protected]
