Azərbaycan, Bakı, 21 noyabr/ Trend , müxbir Ü.İsmayılova/ Azərbaycan CAREC ölkələrinin Avropa iqtisadiyyatına daxil olması üçün qapıdır. Bu barədə cümə günü Bakıda keçirilən Mərkəzi-Asiya Regional İqtisadi Əməkdaşlıq (CAREC) üzrə VII nazirlər konfransında Asiya İnkişaf Bankının (AİB) prezidenti Xaruxiko Kuroda bildirib.
"Azərbaycandan keçən Şərq-Qərb nəqliyyat dəhlizi də açıq dənizlərə, Qara dənizə gedən yoldur", - deyə Kuroda bildirib.
CAREC yolun təkmilləşdirilməsinə 5 mlrd. dollar vəsait yatırıb. Bu məbləğ 2010-cu ilədək 14 mlrd. dollara çatdırılacaq.
Onun sözlərinə görə, Gömrük İdarəsində "vahid pəncərə" sisteminin tətbiqini Azərbaycanın nəqliyyat layihələrinin inkişaf yolunda olduqca mühüm addım hesab etmək olar.
Azərbaycan prezidenti İlham Əliyev noyabrın 12-də 2009-cu il yanvarın 1-dən dövlət sərhədlərinin nəzarət-buraxılış məntəqələrində mal və nəqliyyat vasitələrinin gözdən keçirilməsi zamanı "vahid pəncərə" sisteminin tətbiqi barədə fərman verib. Sistemin tətbiq edilməsində əsas məqsəd mal və nəqliyyat vasitələri nəzərdən keçirilən zaman süni maneələri aradan qaldırılması, müasir tələblərə müvafiq idxal-ixrac əməliyyatlarının aparılmasından ibarətdir.
Azərbaycanda reallaşdırılan neft-qaz layihələri baradə danışan AİB prezidenti ölkə foksunun bundan sonra da enerji ehtiyatlarının itehsalı və satışına yönələcəyini proqnozlaşdırdığını bildirib.
CAREC üzrə VII nazirlər konfransı çərçivəsində tədbir noyabrın 19-da proqrama üzv dövlətlərin yuxarı vəzifəli şəxslərinin görüşü ilə başlayıb. Burada energetika sahəsində əməkdaşlıq strategiyası layihəsinin razılaşdırılması aparılıb.
Azərbaycanın iqtisadi inkişaf naziri Şahin Mustafayev cümə günü bildirib ki, konfrans zamanı energetika sahəsində CAREC ölkələrinin regional əməkdaşlıq strategiyası, Mərkəzi Asiya Regional İqtisadi Əməkdaşlıq proqramının nəzərdən keçirilməsi və təqdir edilməsi planlaşdırılır.
Hazırlanan strategiyanın əsas məqsədi enerjiyə ehtiyac duyan ölkələrin təminatından ibarətdir. CAREC-ə üzv ölkələr arasında elektrikötürücü xətlərin çəkilməsi bu layihəyə aiddir. Eyni zamanda, enerjidaşıyıcıların nəqli üzrə Transxəzər layihələrin dəstəklənməsi də istisna edilmir.
Konfrans çərçivəsində nəqliyyat dəhlizlərinin inkişaf strategiyası üzrə fəaliyyət planı, enerji strategiyası, ticarətin inkişafı üzrə fəaliyyət planlının qəbulu da planlaşdırılır. Konfransda CAREC-in institutlaşdırılması konsepsiyası da təqdim oluna bilər.
CAREC proqramı 1998-ci ildə Asiya İnkişaf Bankının təşəbbüsü ilə təsis edilib. CAREC - səkkiz iştirakçı ölkə (Əfqanıstan, Azərbaycan, Çin, Qazaxıstan, Qırğızıstan, Monqolustan, Tacikistan və Özbəkistan) və altı beynəlxalq təşkilatın (AİB, AYİB, Beynəlxalq Valyuta Fondu, İslam İnkişaf Bankı, BMT-nin İnkişaf proqramı və Dünya Bankı) tərəfdaşlığından ibarətdir.
Proqram infrastruktur layihələrin maliyyələşdirilməsinə və nəqliyyat, ticarətə yardım, ticarət siyasəti və energetika kimi prioritet sahələrdə regonal siyasətin yaxşılaşdırılmasına yönəldilib.
Məqalə müəllifi ilə əlaqə ünvanı - [email protected]
