Azərbaycan, Bakı, 01 dekabr/ Trend , müxbir İ.Xəlilova/ "Azərbaycan hökumətinin Ümumdünya Ticarət Təşkilatının (ÜTT) İşçi qrupu ilə danışıqlarının dekabrın 11-nə Cenevrədə keçirilməsi planlaşdırılan dördüncü raundu 2009-cu ilə təxirə salına bilər", - Danışıqlar qrupunun rəhbəri, xarici işlər nazirinin müavini Mahmud Məmmədquliyev bazar ertəsi bildirib.
"Hazırda dekabrın 10-dan 19-dək ÜTT-yə üzv ölkələrin ticarət nazirlərinin görüşünün keçirilməsi imkanı müzakirə olunur. Görüşün dəqiq tarixi bu günlərdə müəyyənləşəcək, - Məmmədquliyev əlavə edib. - Dekabrın 15-dən Yeni il bayramları başladığı üçün ÜTT-nin İşçi qrupu ilə görüşə vaxt qalmır".
[Görüşdə adətətən ölkələri, ÜTT çərçivəsində ticarət məsələlərinə nəzarət edən nazirliklərin rəhbərləri təmsil edir.]
Nazir müavinin sözlərinə görə, Azərbaycan hökumətinin ÜTT ilə danışıqlarının dördüncü raundu gələn ilə keçiriləcək.
Rəsmi Bakı ÜTT-yə üzvlük məsələsində müddətə deyil, keyfiyyətə üstünlük verir.
Azərbaycan, gələcəkdə iqtisadiyyatın inkişafına zərər vurmamaq üçün ölkə üçün əlverişli şərtlərlə ÜTT-yə daxil olmaq istəyir.
"İqtisadiyyatımızın güclü şəkildə müdafiə olunmasını, kənd təsərrüfatı və sənayenin inkişaf etməsini istəyiriksə, bu sahələrin inkişafına mane olmayacaq şərtləri qəbul etməliyik. Bununla əlaqədar olaraq, danışıqlar çox çətindir", - Danışıqlar qrupunun rəhbəri hesab edir.
ÜTT-yə üzv ölkələr Azərbaycandan bəzi sahələrdə tarif və vergiləri azaltmağı tələb edirlər. Ümumilikdə isə, onlar Azərbaycanın ticarət rejimi və xidmətlər bazarını liberallaşdırmasına təkid etməkdə davam edirlər. O cümlədən, birbaşa filialın açılması ilə ölkənin bank bazarına və 100 faiz xarici kapitala məxsus törəmə strukturların yaradılması ilə sığorta bazarına daxil olmaq üzrə tələblər qalır.
1997-ci ildə Azərbaycan Ümumdünya Ticarət Təşkilatında müşahidəçi statusunda təmsil olunub. Mərkəzi Asiya Regional İqtisadi Əməkdaşlıq (CAREC) proqramının hesablamalarına görə, proqrama üzv ölkələr 2013-cü ilədək ÜTT-yə daxil olacaqlar. Bu gün CAREC-ə üzv səkkiz dövlətdən üçü - Çin, Qırğızıstan və Monqolustan artıq ÜTT-nin üzvüdür.
Müəlliflə əlaqə saxlamaq üçün elektron ünvan: [email protected]