Azərbaycan, Bakı, 01 dekabr/ Trend , müxbir N.İsmayılova, İ.Xəlilova/ Azərbaycanın bankları yenidən istehlak kreditləşdirməsini dayandırıblar, - Trend - ın sorğu apardığı banklardan bazar ertəsi bildiriblər. Praktiki olaraq bütün banklarda kreditləşdirmənin gələn ilin əvvəlindən bərpa ediləcəyi gözlənilir.
Sorğu aparılan bankların siyahısına daxil olub: Rabita Bank, Nikoil Bank, Royal Bank of Baku, Azerbaijan Senaye Bank, Royal Bank of Baku, Atabank, Parabank, Bank of Azerbaijan, Bank Respublika, UniBank, Azerdemiryolbank.
Nikoil Bank daşınmaz əmlakın (mənzilin) girov qoyulması ilə üç min manatdan yuxarı məbləğdə istehlak kreditləri, həmçinin, biznes-kreditlər verir. Bankdan bildiriblər ki, kiçik kreditlərin verilməsinin bərpa olunacağı müddət hələ dəqiqləşdirilməyib.
UniBank avqustun sonundan yeni borcların verilməsi həcmini 80 faiz azaldaraq, istehlak kreditlərinin verilməsi sürətini yavaşıdıb.
Qalan banklardan bildiriblər ki, kreditlərin verilməsi dayandırılıb və bərpa müddətini dəqiqləşdirə bilməyiblər. Lakin bankların nümayəndələrinin rəyinə görə, kreditləşdirmənin gələn ilin əvvəlindən bərpa ediləcəyini gözləmək olar.
Bankların kreditləşdirmə istiqamətində fövqəladə ehtiyatlılıqlarının səbəbi bununla bağlıdır ki, bank sistemində təxminən 1,9 mlrd. manatlıq artıq likvidlik mövcuddur və bu, ümumi bank aktivlərinin 23 faizini təşkil edir.
Azərbaycan Milli Bankının (AMB) pul siyasətinin yumşaldılması üzrə siyasəti də kredit əməliyyatlarının artmasına gətirməyib. Bu siyasətə əsasən, 340 mln. manat əlavə likvidlik təmin edilib.
AMB İdarə Heyətinin qərarları ilə, oktyabrın 14-dən başlayaraq, təkrarmaliyyələşdirmə dərəcəsi üç mərhələdə illik 15 faizdən səkkiz faizədək, faiz dərəcəsinin yuxarı həddi 19 faizdən 13 faizədək, aşağı həddi isə 5 faizdən 1 faizədək azaldılıb. Bank öhdəlikləri üzrə həm milli, həm də xarici valyutada məcburi ehtiyat norması 12 faizdən 6 faizədək, xarici öhdəliklər üzrə məcburi ehtiyat norması 5 faizdən sıfıradək azaldılıb.
"Uçot dərəcəsinin azaldılması bank bazarında orta dərəcənin sabitləşməsinə səbəb olub və artıq faiz dərəcələrinin artması müşahidə olunmur, halbuki, ilin əvvəlindən 2008-ci ilin sentyabrınadək kredit dərəcəsinin orta artımı 1-1,2 faiz səviyyəsində olub", - AMB-nin Baş direktoru Xaqani Abdullayev əvvəllər bildirib.
Bu gün ölkədə kreditlər üzrə orta dərəcə 18,2 faizdir.
Abdullayevin sözlərinə görə, məcburi ehtiyat normasının bir faiz azaldılması bank sisteminə əlavə 40 mln. manat likvidlik gətirə bilər. Müvafiq olaraq, 6 faizlik azaltma sistemə əlavə olaraq, 240 mln. manat təmin edə bilərdi.
Xarici öhdəliklər üzrə məcburi ehtiyat normasının ləğvi bank sisteminə əlavə 100 mln. manat vəsait gətirib.
AMB-nin bank sistemində likvidliyi artırmaq üzrə fəaliyyətinə baxmayaraq, bank kreditləşdirməsinin azalması yalnız biznes-planlara düzəlişlərlə izah oluna bilər. Bank ekspertlərinin rəyinə görə, bu tamamilə obyektivdir. Belə ki, son iki ildə təxminən 20 bank ümumilikdə 2 mlrd. dollardan çox həcmdə xarici borclanma cəlb edib.
Azərbaycan bankları hazırki vaxtda - vəsaitlərin qaytarılmasının sürətlənməsini şərtləndirmiş (bəzi banklar əvvələcədən vəsaitlərin qaytarılması barədə sorğu göndərirlər) dünya böhranı fonunda, öz vəsaitlərinə qənaət etmək və gələn ildən artıq yeni şərtlər əsasında fəaliyyətə başlamağa məcburdurlar.
Dekabrın 1 - nə olan cari mübadilə məzənnəsi - 0,8088 AZN/USD.
Müəlliflə əlaqə saxlamaq üçün elektron ünvan: [email protected]