Azərbaycan, Bakı, 02 dekabr/ Trend , müxbir İ.Xəlilova/ "Azərbaycanda ilk birja indekslərinin tətbiqi ölkənin qiymətli kağızlar bazarının gələnilki konyukturasından asılı olacaq", - Bakı Fond Birjasının (BFB) İdarə Heyətinin sədri Xəyal Abdinov çərşənbə axşamı bildirib. Birinci səviyyə listinqinin yeni meyarlarına cavab verən şirkətlərin minimal sayı 10 olmalıdır.
Listinqin yüksək səviyyəsi təşkilatların şəffaflığa, korporativ idarəetmə standartlarına riayət etmələrini, beynəlxalq auditdən keçmələrini tələb edir. Azərbaycanda listinq şirkətlərinin siyahısı BFB-nin İdarə Heyəti yeni listinq standartları qaydalarını təsdiqlədikdən sonra müəyyən ediləcək.
Abdinovun rəyinə görə, qaydalar 2009-cu ilin birinci yarısı ərzində təsdiqlənə bilər.
Bakı Fond Birjası onların təsdiqi və ölkədə qiymətli kağızlar bazarının inkişafınadək birja indekslərinin aprobasiyasını davam etdirəcək. Onların tərtib edilməsində BFB-yə Varşava Fond Birjası kömək edir. Birinci mərhələdə indekslər səhmlər və dövlət qiymətli kağızları üzrə işlənilir.
"Hər alətin tarixinin yaradılması tələb olunduğu üçün işə salınması nəzərdə tutulan indeksin müxtəlif hərəkət tendensiyaları izlənilir, - Abdinov qeyd edib. - Səhmlər və korporativ istiqrazlar üzrə indeksi işə salmağı çox istərdik. Lakin dünya prosesləri ilə əlaqədar, son vaxtlar ölkədə belə kağızlar üzrə əməliyyatların azalması müşahidə olunur".
Onun rəyinə görə, fond bazarında hərəkət dinamikasının öyrənilməsi birja indeksinin real olaraq işə salınmasınadək bütün mənfi məqamları aradan qaldırmağa imkan verəcək.
Varşava və Bakı fond birjaları arasında tərəfdaşlıq münasibətləri 2007-ci ilin iyununda imzalanmış uzunmüddətli əməkdaşlıq memorandumu əsasında başlayıb. Sənədə əsasən, tərəflər informasiya mübadiləsi sahəsində əməkdaşlıq etmək və iki ölkənin fond bazarlarının inkişafı və inteqrasiyası məqsədilə iş təcrübəsini bölüşmək niyyətindədirlər.
Müəlliflə əlaqə saxlamaq üçün elektron ünvan: [email protected]
