Ukrayna, Kiyev, 03 dekabr / Trend müxbir Z.Novosvitski/ Ukraynanın Nazirlər Kabineti, "2009 -cu il üçün Ukraynanın dövlət büdcəsi haqqında" Qanunun qəbul edilməyəcəyi halda, gələn ilin birinci rübü üçün dövlət büdcəsinin müvəqqəti siyahısını hazırlamağı Maliyyə Nazirliyinə tapşırıb.
Hökumətin rəsmi saytında yerləşdirilən 26 noyabr tarixli 1036 saylı "Büdcə prosesinin təşkilinin bəzi məsələləri" qərarında (dərc olunduğu andan qüvvəyə minir) belə deyilir.
Ukraynanın büdcə layihəsini Nazirlər Kabineti hazırlayır, bu layihə Ali Radada təsdiqlənir və imzalanmaq üçün prezidentə təqdim olunur. Hazırda ölkədə davam edən siyasi böhran büdcə prosesinin pozulmasına səbəb olub. Ukrayna parlamenti faktiki olaraq bu gün işləmir, bundan əlavə, qəbul olunan sənədləri imzalamaq üçün Ali Radada sədr yoxdur.
Hökumətin qərarında deyilir ki, 2009 - cu ilin birinci rübü üçün dövlət büdcəsinin müvəqqəti siyahısı "2008 - cu il üçün Ukraynanın dövlət büdcəsi haqqında" Qanunda təsdiq olunan göstəricilərə əsasən hazırlanır.
Hökumət yerli büdcələrdən dövlət xəzinəsinə aylıq köçürmələrin 2008 - ci ildə dövlət büdcəsində müəyyənləşən vəsaitin 1/12 hissəsi qədərində planlaşdırmağı nəzərdə tutub.
2008 - ci il sentyabrın 15 - də Nazirlər Kabineti "2009 - cu il üçün Ukraynanın dövlət büdcəsi haqqında" qanun layihəsi təsdiq olunmaq üçün Ali Radaya təqdim edib. Amma noyabrın 12- də hökumət sənədi geri götürüb. Ukraynanın Baş naziri Yuliya Timoşenko bu addımı maliyyə böhranı nəticəsində yaranan sosial-iqtisadi şəraitlə əlaqədar olaraq, yeni büdcə layihəsinin hazırlanmasının zəruriliyi ilə izah edib.
Ukraynanın büdcə kodeksinə əsasən, növbəti il üçün əsas maliyyə sənədi barədə Qanun dekabrın 1- dək qəbul olunmalıdır.
Müəlliflə əlaqə ünvanı: trend