Azərbaycan, Bakı, 04 dekabr/ Trend , müxbir E.İsmayılov/ TRACECA nəqliyyat dəhlizinin 15 illik fəaliyyəti ərzində Avropa Komissiyası tərəfindən 61 texniki və 15 investisiya layihəsinin maliyyələşdirilməsinə 157 mln. avro yatırılıb. Bu barədə cümə axşamı Bakıda Azərbaycan hökumətinin Baş nazirinin müavini Abid Şərifov TRACECA-nın yubiley konfransında bildirib.
Şərifovun sözlərinə görə, 1993-1997-ci illərdə bu dəhliz ilə 3 mln. ton müxtəlif tipli yük nəql olunub. 1998-ci ildə bu göstərici 9 mln. ton, 2007-ci ildə 53 mln. ton təşkil edib. Baş nazirin müavini bildirib ki, 1998-ci ildən 2008-ci ilədək təqribən 150 mln. ton yük daşınıb.
Son illər ərzində Azərbaycan dəniz nəqliyyatının inkişafına təqribən 200 mln. dollar yatırıb, bu vəsaitlərə yeddi yeni tanker alınıb. Hava nəqliyyatının inkişafına isə 500 mln. dollar yatırılıb. Bu vəsaitlərə dörd Airbus markalı, altı ATR markalı təyyarə və altı Eurocopter vertolyotu alınıb. Dörd yeni aeroport yenidən qurulub və müasirləşdirilib. Daha 626 mln. dollar Boeing markalı təyyarələrin alınmasına ayrılıb.
Azərbaycanın nəliyaat naziri Ziya Məmmədov bildrib ki, TRACECA-nın iştirakçı dövlətlərinin nəqliyyat administrasiyaları rəhbərlərinin bugünkü görüşündə nəqliyyat dəhlizinin gələcək inkişafı, onun digər dəhlizlərə inteqrasiyası və yük daşımalarının artırılması məsələləri müzakirə olunur.
Azərbaycan, Türkiyə, Gürcüstan, Bolqarıstan, Moldova, Ukrayna, Qazaxıstan, Özbəkistan, Tacikistan, Türkmənistan, Qırğızstan və Ermənistan TRACECA layihəsinin iştirakçılarıdır. TRACECA nəqliyyat dəhlizi üzrə əsas çoxtərəfli sazişlər 1998-ci ildə Bakıda imzalanıb.