Azərbaycan, Bakı, 11 dekabr/ Trend , müxbir N.İsmayılova/ Azərbaycanın xarici borcları 8,6 mlrd. dollar və ya ÜDM-in 16 faizini təşkil edir. Bu barədə Milli Bankın Kredit Təşkilatlarının Fəaliyyətinə Nəzarət Departamentinin direktoru Rəşad Orucov bildirib.
"Azərbaycanın strateji valyuta ehtiyatları xarici borcları təqribən iki dəfə üstələyir ki, bu da dünya maliyyə böhranı şəraitində yüksək ödəmə qabiliyyətliliyini və iqtisadiyyatın təhlükəsizliyini təmin edir", - deyə Orucov bildirib.
Onun sözlərinə görə, özəl sektorun xarici borcları 5,8 mlrd. dollar, yəni strateji valyuta ehtiyatlarının 32 faizini təşkil edir. Bununla yanaşı, ölkənin bank sektorunun xarici borclanması 2 mlrd. dollara çatır. Dünya maliyyə sistemində Azərbaycanın təmiz xarici təklifləri 19 mlrd. dollara bərabərdir.
"Azərbaycan bankları xarici borcların ödənməsi üçün kifayət qədər likvidliyə malikdir və bankların likvid aktivləri bu gün 1,9 mlrd. manat, yəni aktivlərin ümumi həcminin 23 faizini təşkil edir", - deyə Orucov bildirib.
Onun sözlərinə görə, likvidlik tələbləri 30 faiz tələb olunduğu bir halda, Azərbaycan banklarının likvidliyi bir qayda olaraq 60-70 faizə bərabərdir ki, bu da tələb olunan normalardan iki dəfə artıqdır.
Son 15 il ərzində ölkənin bank sektoru ümumilikdə 10 dəfədən çox artıb və dünyanın heç bir ölkəsində belə dinamika müşahidə olunmayıb. AMB-nın ölkənin bank sistemində mühafizəkarlıq siyasətinin daha da gücləndirilməsinə gətirib çıxaran prudensial normaları sərtləşdirməsinə baxmayaraq, 2008-ci ilin 10 ayı ərzində bank aktivləri 48 faiz, kredit portfeli isə 43 faiz artıb.
Milli Bank sədri bildirib ki, ölkənin bank sistemindəki hazırkı vəziyyət yüksək maliyyə sabitliyinin olmasına işarədir. Bunu kredit yatırımları üzrə ümumi həcmin 2,1 faizini təşkil edən, vaxtı ötmüş kreditlərin payı təsdiq edir.
Məqalə müəllifi ilə əlaqə ünvanı - [email protected]
