Azərbaycan, Bakı, 19 dekabr/ Trend , müxbir S.Babayeva/ "Azərbaycana gətirilən ucuz quşçuluq məhsulları, öz məhsullarını daxili bazarda sata bilməyən yerli sahibkarların biznesinə mənfi təsir göstərir", - Respublika Quşçular Cəmiyyətinin rəhbəri Aydın Vəliyev bildirib.
"Biz öz məhsulumuzu sata bilmirik. Belə ki, xaricdən ölkəyə böyük həcmdə ucuz quş məhsulları gətirilir. Əhalinin alıcılıq qabiliyyəti də azalıb", - Vəliyev vurğulayıb.
Quşçular Cəmiyyətinin rəhbəri hesab edir ki, problem ölkədə daxili bazarın müdafiəsi haqqında qanunvericiliyin yoxluğundan ibarətdir.
Onun sözlərinə görə, quşçuluq müəssisələri üçün xaricdən ölkəyə gətirilən bahalı yem məsələsi də aktual olaraq qalır.
"Biz dəfələrlə idxal edilən yemə tətbiq olunan ƏDV-ni ləğv etmək təklifi ilə hökumətə müraciət etmişik,lakin bir nəticə yoxdur. Yalnız taxılın qiyməti azalıb, biz isə, əsasən, soyakimiləri (bir ton soyakimilərin qiyməti 700 dollar təşkil edir) idxal edirik. Toyuq yumurtasını, demək olar ki, maya dəyərinə satırıq, yenə də məhsullar alınmır", - Vəliyev bildirib.
Bir müddət əvvəl ölkənin iki iri quşçuluq fabriki - Mərdəkan Broyler, Hövsan Broyler bağlanıb və Vəliyevin sözlərinə görə, Goradil Quşçuluqla da analoji hal baş verir.
Ötən il Azərbaycanda quş məhsullarının istehsal həcmi 50 min ton təşkil edib. Respublika Quşçular Cəmiyyətinin proqnozlarına görə, 2008-ci ildə bu rəqəm xeyli azalacaq.
Azərbaycanın Quşçular Cəmiyyəti 1997-ci il iyulun 24-də təsis edilib və Azərbaycan ərazisində quş əti və yumurta istehsalı ilə məşğul olan bütün fiziki və hüquqi şəxsləri könüllü əsasda birləşdirir. Onun tərkibinə 29 müəsssisə daxildir (Mardakan Broyler, Siyazan Broyler, Devechi Broyler, Zira Broyler, Arco Co, Imishli Broyler, Shamkir Broyler və s)
Müəlliflə əlaqə saxlamaq üçün elektron ünvan: [email protected]