Azərbaycan, Bakı, 14 yanvar/ Trend , müxbir Ü.İsmayılova/ Dekabrda Bakının ilkin daşınmaz əmlak bazarında yaşayış sahəsinin bir kvadrat metrinin orta qiyməti 3,1 faiz azalaraq 1130 dollara düşüb. Bu barədə "Əmlak bazarı iştirakçıları" İctimai Birliyindən məlumat verilib. Noyabrda bu göstərici bir kvadrat metrə 1167 dollar təşkil edib.
Dekabrda yeni tikililərin əksəriyyəti Yasamal rayonunda inşa edilib. Tikilən obyektlərin sayına görə ikinci yeri Bakının Nəsimi, üçüncü yeri isə Xətai rayonları tutub.
İctimai Birliyin apardığı monitorinqin nəticələrinə görə, dekabrda paytaxtda 555 bina tikilib. Bu göstərici noyabrda 567-ə bərabər olub. Evlər 206 (noyabrda 212) tikinti şirkəti trəfindən tikilib.
"Əmlak bazarı iştirakçıları" Birliyi ekspertlərinin fikrincə, tikinti şirkətləri və binaların sayının azalmasının əsas səbəbi ölkənin daşınmaz əmlak bazarının inkişaf tempinin əhəmiyyətli dərəcədə azalmasına gətirib çıxaran dünya maliyyə böhranının təsiri ilə bağlıdır.
Bakıda yeni tikililər üzrə portfelin böyük hissəsini üç otaqlı mənzillər təşkil edir. Beş otaqlı mənzillər əsasən şəhərin birinci zonasında, iki otaqlı mənzillər isə paytaxtın üçüncü zonasında yerləşir.
Məqalə müəllifi ilə əlaqə ünvanı - [email protected]
