Azərbaycan, Bakı, 21 yanvar/ Trend , müxbir Ü.İsmayılova/
2008 - ci ilin dekabrında Bakının təkrar daşınmaz əmlak bazarında yaşayış mənzilinin bir kv.m -nin orta qiyməti noyabra nisbətdə yeddi faiz düşüb və 1436 dollara çatıb. Bu barədə çərşənbə günü "Əmlak bazarı iştirakçıları" İctimai Birliyindən məlumat verilib.
"Ötən ilin dekabrında təkrar bazarda evlərin alqı-satqısı üzrə bağlanan əqdlərin dinamikası 2,4 faiz azalıb, bu təkrar bazarda son iki il ərzində ən aşağı göstəricidir", - deyə məlumatda bildirilir.
Bazarda təklif 12,9% azalıb ki, bu da qiymətlərin düşməsinə təsir göstərib. Dekabrda əmlakın ekspozisiya müddəti daha doqquz gün artaraq 101 günə çatıb. Bazarda ekspozisiya müddəti, fəallıq və qiymətlərin azalması daşınmaz əmlak bazarında likvidliyin 4,2 faiz azalmasına gətirib çıxarıb.
Bakının təkrar bzarında yeni tikililərin payı 53 faizə yaxınlaşır, bununla yanaşı, təkcə dekabr ərzində onların payı 16,7 faiz artıb.
2008 - ci ilin dekabrında üçotaqlı mənzilin payı 38 faiz, ikiotaqlı mənzilin payı 35,2 faiz təşkil edib. Dekabrda təkrar bazar portfelinin böyük hissəsini Bakının Yasamal rayonu ərazisində yerləşən obyektlər (24 faiz) təşkil edib. Onların sayı ötən aylarla müqayisədə 2,6 faiz artıb. Bazar portfelində ikinci yeri Xətai rayonu (22 faiz), üçüncü yeri Nərimanov rayonu (19,3 faiz) tutub.
Ötən ilin dekabrında alıcıya yerləşdiyi yer və gündəlik həyat üçün obyektlərin tikilməsi baxımından ən cəlbedici rayon Nərimanov olub.
Məqalə müəllifi ilə əlaqə ünvanı - [email protected]
