Azərbaycan, Bakı, 03 fevral/ Trend , müxbir N.İsmayılova/ 2008-ci ildə xarici iqtisadi fəaliyyətin yekunlarına görə, Azərbaycana 232 adda Belarus malı ixrac edilib, onlardan 70-i yeni mallardır, - Belarusun Azərbaycandakı Fövqəladə və Səlahiyyətli Səfiri Nikolay Patskeviç çərşənbə axşamı bildirib.
"İki il yarım əvvəl Belarusdan Azərbaycana 150 adda mal ixrac olunurdu və biz onların sayının artırılmasında zərurətin olduğunu görürdük", - Patskeviç bildirib.
Onun sözlərinə görə, Belarus və Azərbaycanın prezidentləri 500 milyon dollar satış həcminə nail olmağı qarşıya vəzifə qoyublar və bu həcmə iki ölkə arasındakı ticarətdə təxminən 400 adda malın iştirakı ilə nail olmaq mümkündür.
"Biz artıq qarşıya qoyulan vəzifənin yerinə yetirilməsində yarı yoldayıq, - Patskeviç bildirib. - Ən azı 100 mövqe artım lazımdır".
Diplomat bu il üçün mal dövriyyəsi artımının dəqiq proqnozunu verməkdə çətinlik çəksə də, bildirib ki, bu göstərici təxminən 30-50 mövqe artacaq və belə artım üçün bütün zəminlər var.
"Bu iqtisadiyyatın bütün sahələrindən mal çeşidləri olacaq. Bizim ərzaq və yüngül sənaye, eləcə də sənaye istehlakı məhsulları sahələrindəki ehtiyatlarımız tükənməyib", - Patskeviç deyib.
Ötən ilin yekunlarına görə, Azərbaycan və Belarus arasında ixrac-idxal əməliyyatlarının ümumi həcmi 110 milyon dollar təşkil edib ki, bu da 2007-ci illə müqayisədə iki yarım dəfə çoxdur.
Müəlliflə əlaqə saxlamaq üçün elektron ünvan: [email protected]
