Azərbaycan, Bakı, 18 fevral / Trend , müxbir N.İsmayılova/ "17 fevral 2009-cu il tarixində Yunanıstan-Azərbaycan Biznes Forumu çərçivəsində Azərbaycan Françayzinq Assosiasiyası (AFA) ilə Yunanıstan Françayzinq Assosiasiyası arasında Əməkdaşlıq Müqaviləsi imzalanıb", - AFA-nın məlumatında deyilir.
Müqaviləni Azərbaycan tərəfdən Azərbaycan Françayzinq Assosiasiyasının direktorlar şurasının sədri Elşən Musayev və Yunanıstan tərəfdən Yunanıstan Françayzinq Assosiasiyasının Baş direktoru Sotiris Yanakakis imzalayıblar.
Əməkdaşlığa dair müqaviləni imzalamaqda məqsəd Azərbaycanda və Yunanıstanda françayzinq təcrübəsinin öyrənilməsi, effektiv inkişafı və yayılması, beynəlxalq françayzinq sisteminin yerli bazar şərtlərinə uyğunlaşdırılmasına kömək və informasiya mübadiləsi etməkdir.
Azərbaycan Françayzinq Assosiasiyası 2007-ci ilin fevral ayında yaranıb və qeydiyyatdan keçib. AFA 2007-ci ilin sentyabr ayında Baltik Françayzinq Assosiasiyası, noyabr ayında isə Türkiyə Françayzinq Assosiasiyası ilə əməkdaşlığa dair müqavilə bağlayıb. AFA Rusiya, Almaniya, Ukrayna françayzinq assosiasiyaları ilə sıx əməkdaşlıq edir. AFA-nın məqsədi Azərbaycanda françayzinq təcrübəsindən istifadə etməklə xırda və orta sahibkarlığı inkişaf etdirmək, yeni brendlərin ölkəmizə gətirilməsi və Azərbaycanda françayzinq qanunvericiliyinin öyrənilməsi və tətbiq edilməsidir. Assosiasiya hazırda bir çox Amerika və Avropa şirkətlərinin Azərbaycanda françayzinq yolu ilə açılması ilə məşğul olur.
Fevralın 18-nə olan rəsmi məzənnə 0,8063 AZN/USD təşkil edir
Məqalə müəllifi ilə əlaqə ünvanı: [email protected]
