Azərbaycan, Bakı, 20 fevral / Trend , müxbir Ü.İsmayılova/ Yanvarda Bakının ilkin daşınmaz əmlak bazarında qiymətlər 2008-ci ilin dekabrına nisbətdə 3,1 faiz azalaraq, bir kvadrat metr üçün 1,10 min dollara düşüb. Bu barədə cümə günü "Əmlak bazarı iştirakçıları" İctimai Birliyindən bildiriblər.
Ay ərzində ötən ilin dekabrında qeydə alınan 555 evə nisbətdə 550 binanın tikintisi davam etdirilib. Binaların tikintisi 202 tikinti şirkəti tərəfindən həyata keçirilib.
Tikilən binaların sayına görə, Yasamal rayonu öndədir. İkinci yerdə Nəsimi rayonu, üçüncü yerdə isə Bakının Xətai rayonu qərarlaşıb. Bütün bu tikililər ilkin mənzil bazarının ümumi portfelinin 66,8 faizini təşkil edib.
Yanvarda bir otaqlı mənzilin orta sahəsi orta hesabla 56,2 kvadrat metr (2008-ci ilin dekabrında 58,6 kvadrat metr), iki otaqlı mənzilin orta sahəsi 90,3 kvadrat metr (91,2), üç otaqlı mənzilin orta sahəsi 137,7 kvadrat metr (135,8), dörd otaqlı mənzilin orta sahəsi 191,4 kvadrat metr (181,3), beş otaqlı mənzilin orta sahəsi 228,8 kvadrat metr (236,4) təşkil edib.
"İlkin mənzil bazarında azalma dünya maliyyə böhranının təsiri səbəbindən baş verir", - deyə təşkilatdan bildiriblər.
Məqalə müəllifi ilə əlaqə ünvanı: [email protected]
