Azərbaycanda sosial sığortaya malik olanların sayı artıb

Azərbaycan, Bakı, 23 fevral/ Trend , müxbir Ü.İsmayılova/ Azərbaycanda fərdi uçot sistemində fərdi şəxsi hesabı olan sığorta olunanların sayı 1,51 mln. nəfər təşkil edir. Bu barədə Dövlət Sosial Müdafiə Fondunun bazar ertəsi yayılan məlumatında bildirilir.

"Fərdi şəxsi hesabı olan sığorta olunanların sayı 2008-ci ilin analoji dövrü ilə müqayisədə 185 min nəfər artıb", - deyə məlumatda bildirilir.

Bu insanların böyük hissəsi (432 min nəfər) 40-50 yaş aralığında olan şəxslərdir. 30 yaşa kimi sığorta olunanların sayı 376 min nəfər, 30-40 yaşa kimi sığorta olunanlar 343 min nəfər, 50-60 yaşa kimi olanlar 261 min nəfər, 60 yaşdan yuxarı sığorta olunanlar isə 101 min nəfərdən ibarətdir.

Fərdi uçot sistemi Azərbaycan Respublikası qanunvericiliyinə uyğun əmək pensiyalarının və digər sosial müdafiə hüquqlarının təmin edilməsi üçün hər bir sığorta olunan haqqında məlumatların uçotunun təşkili və aparılmasından ibarətdir.