Türkmənistan, Aşqabad, 16 mart / Trend , müxbir Q.Həsənov /
Türkmənistan prezidenti Qurbanqulı Berdiməhəmmədov ərzaq qiymətlərinin bahalaşmasından narazı qalıb və müvafiq qurumlardan onların dərhal "ən münasib" səviyyəyə salınmasını tələb edib. Bu barədə bazar ertəsi səhər "Altın Asır" milli telekanalı xəbər yayıb.
Dövlət başçısı qiymət siyasəti məsələsini Nazirlər Kabinetnin sonuncu iclasında qaldırıb. İqtisadiyyat və İnkişaf Nazirliyinə və digər aidiyyatı qurumlara ölkə bazarlarında formalaşan ərzaq məhsulları qiymətlərilə bağlı vəziyyət üzrə müqayisəli təhlil aparmaq və onların münasib vəziyyətə gətirilməsi üçün tədbirlər həyata keçirmək tapşırılıb.
Berdiməhəmmədov qiymət qoyma, şəhər bazarlarına lazımi həcmdə meyvə, tərəvəz, göyərti və digər qida məhsullarının əlverişli qiymətlərlə tədarükünün təşkil edilməsi, həmçinin onların saxlanılma şəraitinin yoxlanılması ilə bağlı bütün məsələlərin tənzimlənməsini tələb edib.
Bu vəzifənin icrasını maliyyə sahəsinə rəhbərlik edən baş nazir müavinləri bilavasitə öz nəzarətlərinə götürməlidirlər. Berdiməhəmmədov həmçinin qeyd edib ki, "əhalinin rifahının qaldırılmasına yönəldilmiş ölkədə reallaşdırılan sosial-iqtisadi proqramlarla bağlı bütün kompleks məsələlərlə sıx məşğul olmaq" lazımdır.
Məqalə müəllifi ilə əlaqə ünvanı - [email protected]
