Azərbaycan, Bakı, 23 aprel / Trend , müxbir Ü.İsmayılova /
Hazırda "Şahdağ" yay-qış turizm kompleksi ərazisində layihələndirmə və telekommunikasiya xətlərinin çəkilməsi işləri aparılır. Bu barədə mədəniyyət və turizm naziri Əbülfəs Qarayev Nazirlər Kabinetnin 2009-cu ilin birinci rübündə sosial-iqtisadi inkişafın yekunlarına həsr olunmuş iclasında bildirib.
Nazir bildirib ki, 2009-2011-ci illərdə kompleksin mərkəzi meydanının, iki əsas qaldırıcı stansiyanın tikintisi, səkkiz qaldırıcı avadanlığın və süni qar istehsal edən avadanlığın quraşdırılması, daxili yolların çəkilməsi və kompleksin infrastruktur sisteminin tikintisi üzrə işlərin başa çatdırılması planlaşdırılır.
Azərbaycanın Qusar rayonunda tikiləcək "Şahdağ" yay-qış turizm kompleksi 340 yerlik dörd ulduzlu otel, lift bazası, restoran, xizəkçilik məktəbləri, kanat yollar, süni buz sistemi və s. ibarət olacaq.
Azərbaycan Mədəniyyət və Turizm Nazirliyi 2008-ci ilin noyabrında kompleksin layihələndirilməsi üçün tender elan edib.
Azərbaycan, Avstriya, Almaniya və İsveçrədən olan mütəxəssislər tenderdə iştirak üçün öz təkliflərini veriblər.
Məqalə müəllifi ilə əlaqə ünvanı - [email protected]