Azərbaycan, Bakı, 29 aprel / Trend , müxbir Ü.İsmayılova /
Azərbaycanın Daşınmaz Əmlakın Dövlət Reyestri Xidməti (DƏDRX) Dünya Bankı ilə birgə layihə çərçivəsində Xırdalan şəhəri və Novxanı qəsəbəsinin kadastrının yaradılması üzrə pilot layihəni başa çatdırıb. Bu barədə Dövlət Xidmətinin çərşənbə günü yayılan məlumatında bildirilir.
Pilot layihə zamanı bu ərazilərdə yerləşən obyektlərin texniki və hüquqi vəziyyəti barədə informasiya bazası hazırlanıb.
Layihə tələblərinə əsasən, əvvəl elan olunan tender əsasında pilot layihə Türkiyənin "İntegris" şirkəti tərəfindən icra olunub.
Azərbaycan hökuməti və DB 2007-ci ilin iyulunda daşınmaz əmlakın vahid kadastrı sistemini birgə tətbiq etmək haqqında saziş imzalayıb. Layihə dörd komponentdən ibarətdir - daşınmaz əmlakın qeydiyyatı; dövlət əmlakının idarə edilməsi və reyestri; baza xəritəçəkmə və torpaq kadastrı; treninqlər, siyasətin formalaşdırılması və layihənin idarə edilməsi. Layihənin dəyəri 38,57 mln. dollar təşkil edir. Bunun 30 mln. dolları DB-nin kreditinin payına düşür. Kredit ehtiyatları beş il güzəştli dövr olmaqla 20 il müddətinə ayrılıb.
Məqalə müəllifi ilə əlaqə ünvanı: [email protected]
